Hargeysa (SLpost)- Murashaxiinta u taagan Doorashada Guddoomiyaha Golaha Wakiillada ee Somaliland, ayaa maanta xafiiska Xoghaynta Guud ee Golaha u gudbiyey Taariikh-nololeedkooda Waxbarasho, Xirfado iyo waayo-aragnimo.
Guddoomiye ku-xigeenka 3aad ee Golaha Wakiillada Cali Xaamud Jibriil iyo Xildhibaan Yaasiin Maxamuud Xiir Faratoon oo labadoodu u sharraxan xilkan, waxa CV-yadooda ka guddoomay Xoghayaha Guud ee Golaha Wakiillada Cabdirisaaq Siciid Ayaanle.
Kalfadhiga 6aad ee Golaha Wakiillada Somaliland oo lagu wado inuu si rasmi u furmo Axadda Berri, ayaa la filayaa in lagu doorto Xilka Guddoomiyaha Golaha Wakiillada oo uu banneeyey Cabdirisaaq Khaliif Axmed oo xilkaas hayay muddo laba sanno ku dhow ka hor intii aanu iska casilin dhawaan kaddib markii uu ku biiray Kooxaha Huwanta ah ee ku sugan magaalada Laascaanood, kuwaas oo dagaallo ay Qaranimada Somaliland kaga soo jeedaan Ciidamada Qaranka. Guddoomiyihii hore ee Golaha Wakiillada Cabdirisaaq Khaliif, ayaa ka soo baxay xisbiga Mucaaradka ah ee Waddani.
Xilka Guddoomiyaha Golaha Wakiillada oo u dhexeeya labada xildhibaan, ayaa la filayaa in la doorto maalinta Berri, waxaana jira loolan adag oo u dhexeeya Xildhibaan Faratoon oo laga soo doortay gobolka Sool iyo Xildhibaan Cali Xaamud Jibriil oo laga soo doortay Gobolka Awdal.
Guddoomiye ku-xigeenka 3aad ee Golaha Wakiillada Cali Xaamud Jibriil oo la filayo inuu maalinta Berri golaha hortiisa ku shaaciyo inuu iska casilay xilka guddoomiye ku-xigeenka, waxa doorashadiisa dabada ka riixaya oo taageeraya axsaabta Mucaaradka halka xildhibaan Faratoon uu taageero ka haysto xukuumadda iyo mucaaradkaba.
Cali Xaamud Jibriil, ayaa ka tirsan kana soo baxay Xisbiga Mucaaradka ah ee UCID, halka Yaasiin Maxamuud Xiir oo ka soo baxay Xisbiga talada dalka Haya ee Kulmiye uu haatan ka tirsan urur-siyaasadeedka KAAH oo uu dhowaan ku biiray.
Loollanka Doorashada Guddoomiyaha Golaha Wakiillada, waxa kale oo ku soo biiray Xildhibaan Maxamed Khadar Daahir oo gobolka Maroodijeex uga soo baxay Xisbiga Mucaaradka ah ee UCID, isagoo gelinkii dambe Xoghayaha Golaha Wakiillada u gudbiyey taariikh-nololeedkiisa waxbarasho iyo waayo-aragnimo.
Golaha Wakiillada Somaliland, ayaa ka kooban 82 Xildhibaan ilaa haddana lama xaqiijin karo tirada xildhibaannada ay kala haystaan labada murashax, in kasta oo uu jiro loolan adag oo labada dhinac ku kala riixanayaan taageerada iyo codadka xildhibaannada Golaha Wakiillada.
Somalilandpost.net
contact@somalilandpost.net