Tog-Wajaale (SLpost)- Laanta Socdaalka Somaliland ayaa markii labaatanaad dib ugu celisey dalka Itoobiya Tahriibayaal kontomeeyo ku dhow oo laga soo qabqabtey agagaarka Caasimada Hargeysa oo ay dhuumasho ku galayeen iyo qeyb kale oo lagu soo qabtey inta u dhexeysa Tuulada Kalabeydh iyo Wajaale.
Tahriibayaashan Itoobiyaanka ah, oo damacsanaa in ay dhuumasho kaga gudbaan dalka Gudihiisa iyagoo usii jeeda dhinaca Maamul Goboleedka Puntland oo ay Magaalada Boosaaso ka raacaan doonyaha tahriibta, ayaa Ciidanka Laanta Socdaalka ee Somaliland gaar qaybta Xarunta Guud ay kasoo qabqabeen tahriibayaashan iyaga oo dhuumasho ku galaya Caasimada Somaliland ee Hargeysa kadib markii la ogaadey inay dhuumasho ku raacayaan Gaadiidka iskaga Goosha Caasimada Somaliland ee Hargeysa iyo Magaalo-Xuduudeeda Tog-Wajaale.
Taliyaha Laanta Socdaalka Gobolka Gabiley Cabdirashiid Axmed Xasan ayaa ka warramay sida ay u soo qabteen Tahriibayaashan iyaga oo ku sugan naxaaxiga Caasimada Somaliland ee Hargeysa, kadib markii ay nawaaxiga xuduuda kaga gudbeen dhuumasho, waxa kale oo uu xusey in 23 kamid ahna laga soo qabtey Kalabeydh iyo Wajaale dhexdooda, isagoo xusey in ay isla maanta
ay dib ugu celiyeen dalka aynu jaarka nahey ee Itoobiya, in ay yihiin kuwii labaatanaad ee noocooda ah ee la qabqabto dibna loogu celiyo dalka Itoobiya.
Waxa uu Taliyihu xusey in Xarunta Laanta Socdaalka TogWajaale ay subax kasta qabaqabtaan tahriibayaal fara badan oo dhuumasho ku socda kuwaas oo ay si qubane ah dib ugu celiyaan dalkaasi ay kasoo talaabeen ee Itoobiya, Waxaanu xusey in tahriibayaashu u badan yihiin Qowmiyada Oromada kuwaas oo qaarkood laga soo qabqabto Kalabeydh iyo Wajaale dhexdooda, Gabiley iyo Kalabeydh dhexdooda iyo meelo kala duwan oo ay lug ku marayaan.
”Ma aha markii u horeysey ee nooceeda ah ee aanu qabqabno tahriibayaal dhuumasho kusoo galaya dalka Somaliland una sii jeeda dhinaca Maamul Goboleedka Puntlnad, oo ay Magaalada Boosaaso ka raacaan doonyo lagu tahriibinayo kooxdan aanu saaka qabaney waxey ahaayeen sodomeeyo dhuumasho ku baxayey, oo laga soo qabtey nawaaxiga Caasimada Somaliuland ee Hargeysa, kuwaas oo ay soo qabqabteen Ciidanka Laanta Socdaalka Xarunta Guud waanan
uga mahad celinayaa Taliyaha Guud ee Laaanta Socdaalaka Somaliland Maxamed Yuusuf oo muddadii uu joogey si wanaagsan gacan nooga siiyay qabqabashada tahriibayaasha, waxaana dhinaca Hargeysa laga keenay 33 tahriibayaal ah oo u dhashey Itoobiya halka 23 kamid ahna laga soo qabtey Kalabeydh iyo Wajaale dhexdooda, isla saaka ayaanu u gudbinay dhinaca dalkan aynu jaarka nahey ee Itoobiya oo ay kasoo gudbeen markii hore, Subaxdii Alle keenaba
qaar ayaanu qabanaa oo socodkoodu waa joogto,” sidaa waxa yidhi Taliyaha Laanta Socdaalka Gobolka Gabiley, ee fadhigiisu yahey Xarunta Socdaalka TogWajaale.
Waxaanu intaa ku darey hadalkiisa in aanay aheyn markii u horeysay ee ay tani noqoneyso markii labaatanaad sanadkan oo kaliya ee ay tahriibayaal xooggan dib uga celiyaan Gudaha Dalka Somaliland, Waxaanu hadalkiisa digniin culus ugu soo jeediyay Guuda ahaanba Gaadiidleyda Iskaashatada Gaadiidka ee iskaga kala goosha Caasimada Somaliland ee Hargeysa iyo Magaalada TogWajaale ee Xarunta Degmada TogWajaale ee Dhinaca Somaliland oo ay rakaabka kana qaadaan kuna soo rogaan in ay iska ilaaliyaan qaadista tuugada ah,isagoo xusey in cidii lagu qabto ay horgeyn doonaan sharciga kuna muteysan doonaan Xadhig iyo ganaax culus.
Waxa joogto noqotey tahriibayaasha Itoobiyaanka ah in ay maalin walba kazoo Gudbaan dhinaca Dalka Itoobiya, kuwaas oo dhuumasho kaga gudbaya Gudaha Somaliland iyagoo usii jeeda Maamul Goboleedka Puntland, oo ay Magaala Xeebeeda Boosaaso ka raacaan doonyaha tahriibta ah, iyadoo Laanta Socdaalka Tog-Wajaale ee Somalilandna ay u tahey mid joogto ah qabaqabashada iyo ilaalinta ay kula tacaalayaan sidii loo xakameyn lahaa tahriibayaashaasi,
waxaana hada aad u yaraadey Tahriibayaashii Soomaalida ahaa ee u kala dhashey Somaliland iyo dalka Soomaaliya oo inta badan laga soo celin jirey Itoobiya iyo Suudaan xuduuda u dhexeysa kuwaas oo lagu soo daadiyo Magaalada Tog-Wajaale .
SOMALILANDPOST.NET
webmaster@somalilandpost.net