[H]argeysa (SLpost)- Kulan wada tashi iyo xog isweydaarsi ah oo ku saabsan barnaamijka dib u habaynta Cadaaladda ayaa maanta ka qabsoomay Hotelka Maansoor ee Magaalada Hargaysa.
Kulankan oo soconaya muddo labo maalmood ah ayaa waxaa ka soo qayb galay mas’uuliyiin xukuumadda ka tirsan oo ay ka mid yahiin wasiirada wasaaradaha, cadaalada Dr Xuseen Axmed Caydiid, warfaafinta mudane Cabdi Yuusuf Ducaale (Boobe), shaqada iyo arimaha bulshada Mudane maxamuud Axmed barre (Garaad) Gudoomiyaha maxkamadda sare Dr Yuusuf Ismaaciil Cali, Xeer ilaaliyaha guud ee Qaranka Xasan Axmed Cali, Agaasimaha guud ee wasaarada Cadaalada iyo Madaxa UNDP ee Somaliland. Waxaa kaloo goobjoog ka ahaa kulankan qaar ka mid ah mas’uuliyiinta Jaamacadaha, Gudoomiyaha haweenka qareenada ah ee Somaliland iyo marti sharaf kale.
Wasiirka cadaladda iyo garsoorka Somaliland Mudane Xuseen Axmed Caydiid uu kulnkaasi ka hadlay ayaa sheegay in shirkii dhanka cadaalada ee sanadkii hore qabsoomay laga soo saaray shuruuc iyo xogo ku saabsan dib u habaynta cadaalada isla markaana kulankan lagu qaybin doono qoraalo arimahaas ku saabsan oo la isku soo Min guuriyay.
Wasiirku waxuu sheegay inay lama huraan noqotay in la dejiyo qorshahii shanta sano ee lagu horumarinayey caddaaladda Somaliland, taasina ay tahay mid u baahan in la helo bah cadaaladeed oo wada socota.
Wasiirka shaqada iyo arimaha bulshada maxamuud Axmed barre (Garaad) ayaa isna halkaasi ka sheegay in qorshaha xukuumadda Somaliland ee ku qotoma dib u habaynta cadaaladu uu yahay mid ka midho dhalintiisa ay bulshadu inaga sugayso, hay’adaha garsoorkuna noqdaan kuwo gaadha cadaalada dhabta ah.
wasiirka wasaarada, warfaafinta Cabdi Yuusuf Ducaale (Boobe), oo kulankaasi ka hadlayey ayaa sheegay in kulankani yahay mid midaynaya bulshada iyo dawlada, taas oo macnaheedu tahay ayuu yidhi wasiirku inaynu talada iyo toosinteedaba wada leenahay.
Mudane Boobe waxuu sheegay inay hawl adag u baahan tahay sidii sharci dal u degsan wax looga bedeli lahaa isagoo intaas ku daray in Qaabka ay wasaaradda cadaaladu adeegsanayso ee ku qotoma hanaanka wada tashi uu noqonayo mid wax badan oo ka mid ah guul lagu xaqiijin karo.
Gudoomiyaha maxkamada sare ee Somaliland Dr Yuusuf Ismaaciil cali oo kulankaas ka hadlayey ayaa sheegay in loo baahan yahay in shirkan lagaga faa’iidaysto sidii loo habayn lahaa sharciga cadaalada iyadoo laga duulayo ayuu yidhi qorshahii ka soo baxay shir cadaaladeedkii qabsoomay badhtamihii sanadkii hore.
Gebagebadii waxaa kaloo halkaa ka hadlay mas’uuliyiin ay ka mid yahiin xeer ilaaliyaha guud ee qaranka, agaasimaha guud ee wasaradda cadaalada iyo madaxa hay’ada UNDP u qaabilsan Somaliland.
SLpost News/Hargeysa