Nairobi (SLpost)- Ciidamada sida gaar ah u tabobaran ee dalka Yuhuudda, ayaa maanta la geliyey Xarunta Wesgate Mall ee magaalad Nairobi oo dabley hubaysani dorraad la wareegeen, ka dib markii ciidamada kala duwan ee dalka Kenya ay wax isbeddel ah ka samayn waayeen muddo 24 saac ah oo u xeernaayeen dhismaha xaruntaas.
Dabley u abtirsata kooxda Al-Shabaab ee ka dagaalanta gudaha dalkaasi Somaliya, ayaa weerar u qaaday Xarunta Westgate Mall oo ah suuq-weyne Ganacsi oo dadka reer Galbeedka ah iyo muwaadiniinta reer Kenya ee lacagta haystaa ay ka adeegtaan, waxaana halkaas ku dhintay 59 qof oo isugu jira dad Ajaanib ah iyo muwaadiniin Kenyan ah halka 178 kalena ay ku dhaawacmeen, halka dad tiradooda gaadhaya ilaa 1000 qof laga soo samato-bixiyey dhismaha.
Ciidamada sida gaar ah u tabobaran oo ka socda dalka Israel, ayaa soo-fargeliyey dhacdadan, kuwaas oo gudaha galay xaruntaas oo ay weli ku jireen ilaa 15 nin oo dabdleyda weerarka qaadday ah, kuwaas oo gudaha dhismaha afduub ugu haysta dad badan oo wakhtiga weerar laga qaaday ka adeeganaya xarunta ganacsi.
Ciidamada Israaiil oo ay wehelinayaan Saraakiil ka socday hay’adda Sirdoonka Maraykana ee FBI, waxa ay si ballaadhan ugala qayb-qaatay Ciidamada dalka Kenya hawl-gallada lagu bad-baadinayo dadka shacabka ah ee lagu haysto gudaha Dhismaha, ka dib markii Ciidamada dalkaasi ay ku guul darraysteen inay gudaha u galaan dhismaha oo ay soo badbaadiyaan maxaabiista la haysto taasoo keentay inay yimaadaan ciidamada sida gaarka ah u tababaran ee caawinaya ciidanka Kenya.
Dhanka kale, xubno kamid ah qoyska madaxweynaha dalka Kenya Uhuru Kenyata, ayaa ka mid ahaa dadkii dorraad lagu dilay weerarka lagu qaaday xarunta gacacsiga ee Westgate ee magaalada Nairobi.
Inkasta oo aan la cadayn tirada qaraabada madaxweynaha ee ku dhimatay weerarka lagu qaaday Westgate, haddana madaxweynaha Kenya oo dadweyniisa khudbad u jeediyay ayaa ka dhawaajiyay in qaar ka mid ah qaraabadiisa ugu dhow-dhow ay ku dhinteen weerarkaas.
“Waan dareensanahay xanuunka aad dareeemaysaan, marka la eego aniga oo shakhsiyan ku waayay weerarkan xubno aad iigu dhow oo ka tirsan qoyskayga, Illaahey waxaan ka baryayaa inuu kulligeen samir naga siiyo inta aan ka gudbayno masiibadan,” ayuu yidhi madaxweynaha Kenya.
Khasaaraha ka dhashay weerarkan lagu qaaday Xarunta Ganacsi ee Westgate oo kooxda Al-Shabaab masuuliyaddeeda sheegatay, waxa dadkii ku dhaawacmay weerarkaas oo tiradooda lagu sheegay inay kor u dhaafayaan ilaa 170, isuguna jira muwaadiniin Kenyan ah iyo qaar ajaanib ah, lagu daawaynayaa Cusbitaallada magaalada Nairobi.
Dhacdadan oo maalintii saddexaad maraysa, ma jiraan wax horumar ah oo laga sameeyey badbaadinta dadka lahaystayaasha ah ee Gudaha xaruntaas ku jira, iyada oo la sheega in dableyda weerarka fulisay oo tiradoodu lagu sheegay ilaa 16 qof, marka laga reebo mid hawlgalkan ku dhintay, ay wel ku jiraan qol ka samaysan muraayadaha rasaasta celiya oo ku yaala dhismaha Xaruntaas.
SOMALILANDPOST.NET
contact@somalilandpost.net