Muuse Biixi Cabdi waa guddoomiyaha Xisbiga tallada haya ee Kulmiye, waana musharaxa Madaxwayne ee xisbigaasi u tartami doona doorashada 2017ka ee lagu waddo inay ka qabsoonto Somaliland.
Cabdiraxmaan Maxamed Cabdilaahi (Cirro) waa hogaamiyaha Xisbiga mucaaridka ah ee Waddani, Waa guddoomiyaha golaha wakiilada Somaliland, waana musharaxa Madaxwayne ee xisbiga Waddani uga qaybgalaya doorashada soo socota ee madaxtooyada.
Muuse iyo Cirro waa laba siyaasi oo midba dhinaciisa wax u doonayo siyaasad ahaan iyo maamulba, waa labada nin ee imika ku hirdamaya saxaadada siyaasada Somaliland, waa hogaamiyayaal midba amaantiisa leeyahay oo dalka wax u soo qabtay, waana nimanka ilaa imika sida tooska ah ugu loolamaya doorashada soo socota ee inta badan tartanku ka dhaxeeyo, waa niman u heelan sidii uu mid waliba u hanan lahaa quluubta shacabka reer Somaliland ee iyagu kala doorta hogaamiyaha ay markaasi u arkaan inuu wadi karo dalka oo uu gaadhsiin karo, Horumar, badheedhe, barwaaqo.
Hadaba haddii aynu soo qaadano taariikh kooban oo ku saabsan waxqabadkooda, Aynu ku horeyn Muuse Biixi, Muuse Biixi waxaa la sheegaa inuu ahaa sarkaal ka tirsan ciidamadii cirka ee dawlada jamhuuriyada Somaaliyeed, waa duuliye sare xaga ciidamada cirka, waxaa uu ka mid noqday Jabhadii SNM, waxaana uu ka tirsanyahay Mujaahidiinta Doorka wayn ka qaatay Dib u xoreynta dalka maanta la yidhaa Somaliland, Muuse waxaa uu wasiirka arrimaha gudaha ka noqday dawlada Maxamed Xaaji Ibraahim Cigaal, Muuse waa guddoomiyaha Xisbiga Kulmiye waana musharaxa madaxwayne ee Xisbiga Kulmiye.
Cabdiraxmaan Maxamed Cabdilaahi waxaa uu wax ku bartay dalkii la odhan jiray Somaliya, waxaa uu ahaa Safiirka Ruushka u fadhiya dawlada Somaliya mudo dheer, waa dublamaasi ku xeel dheer xidhiidhka arrimaha dibada, waxaa uu muddo dheer-yahay Guddoomiyaha golaha wakiilada Somaliland, imika waa Guddoomiyaha iyo musharaxa madaxwayne ee Xisbiga Waddani, Cirro Golaha dhexe ee Waddani ma dooran balse isaga ayaa ah shakhsiga kaliya ee Noqonaya Musharaxa madaxwayne Waxaa jira siyaasiyiin sheega inay la tartamayaan waxaase lagu asturayaa dimuqraadiyada si loo yidhaahdo waalala tartamay.
Musharaxa Madaxwayne ee Xisbiga Kulmiye Muuse Biixi Cabdi iyo Guddoomiyaha Xisbiga Waddani waxaa ay safar shaqo isku raaceen dalka Ethopia waxaa ku wehelinayay safarkan Agaasimayaal, xildhibaan ka tirsan golaha wakiilada oo iskugu jira Waddani iyo Kulmiye-ba, Rag waa kii kaftama meelkasto oo uu jooga’e waa la kaftamay.
Waxaana diyaaradaasi safraysay ku dhex kaftamay Labadaasi nin ee aynu kasoo sheekaynay waa Muuse Biixi iyo Cirro’e
Kaftankoodii waxaa uu u dhacay Sidan:-
Muuse Biixi :Cabdiraxmaan Maxamed Cabdilaahi Cirrooy waxaad doonaysaa in aad dalkan Madaxwayne ka Noqoto
Cirro: Haa Muuse Biixi Cabdi.
Muuse Biixi: Annigaa kaaga horeynaya madaxtinimada dalka
Cirro: Waayo Muuse.
Muuse Biixi: Waddankan waxaanu usoo cabnay “Kaadidayada” ee waxaad doonaysaa adigoo musaasad jaqaya inaad Ayaar iska gasho madaxtooyada oo guriga aad ka taliso u jirta 20mitir.
Cirro: Muuse Anniguba waxaan usoo Cabay waddankan “Barafka” ee madaxwayne ayaan ka noqonayaa.
Fiiro Gaara: Sheekadan waxaan kasoo xigtay oo iiga sheekeeyay masuul ka tirsan xukuumada Somaliland oo aanan jeclayn inaan magaciisa idiin soo gudbiye, waana kaftan run ah oo Muuse Iyo Cirro ku dhexmaray Diyaaradii ay ugu safrayeen Addis Ababa, Waana mudo imika laga joogo sanad iyo badh.
W/Q: Ilyas Abdi Ali