Gabaygan waxa la yidhaa JU-JUUB, wuxuuna Jawaab u yahay cid kasta oo u haysta inuu qarankani ku dhisanyahay Dhalanteed kuna yimid Caadifad, wuxuuna soo baxay 18/May/2013
Jiimlayda gabay waayo dheere, Jeebka kuma hayne,- Jiibtiyo araartii ma ridin, igu jaxaysnayde,
- Jumladbaan ku haystaa murta, ina jibaaxoowe,
- Jaahiliyo midkii aan aqoon, way jajabiyaane,
- Dhagta jalaq u siiyoo bulshooy, Jooja hadalkiina,
- Ingiriiska jaanka ah markan magane , jaan gooyay,
- Calankiyo kolkaan dawlad jama, Joojay lugihiisa,
- Waataan jamaadeey mar qudha, Xamar u jegaysatay,
- Waataan jikaaray ka riday, jooflihii qabayae,
- Abaalkayga maba jari karaan, jaadkastuu yahaye
- Jibadii I haysiyo ma jiro, jidhidhicoodkiiye,
- Qalbigaygii kuu jaabudnaa, jeesay waa hora’e,
- Calankii jamuudiga ahaa, jeexayoo dhigaye,
- Wanaag iyo jacaylkaan qabiyo, nacay jarmaadkiiye,
- Walaalnimadii aan koolin jiray, waad jardhamiseene,
- Koomaad ku jiideen intaad, jeelka galiseene,
- Ka jibraday kolkii aad dhurwaa, jabisay xeerkiiye,
- Laabtaydana ka jaray, midaw danbiyo jariska xoorkiiye,
- Wixii aan u jeediyo adaan, jalan yahuuntiiye,
- Gafna maaha waan kaa jibdhaday, ina jareeroowe,
- Jeeroon aqoonsiga hantiyo, sharfta joogeeda,
- Jeeroon aduunyada ka helo, ju’asho dheeraada,
- Jeeroo dulmigii aad gasheen, jaaha ka cadaado,
- Kuu joojin maayee dadoow, jabadinkaa yaala,
- Oo waynu kala jeedsanee, jiida naga daaya,
- Jeexyada wajeeriyo ilaa, jubada hoosteeda,
- Jigjigiyo jabuutiyo ilaa, jararka laas-dhuure,
- Jamhuur qudha inay noqotabaan, jaaranoow wadaye,
- Jeeskaliya inaan wada dhisnaan , Jaambadoow rabaye,
- Waxa aan u jeel qabay in badan, jamaca soomaale,
- Jeed-jeedsan maayee runtaan, kuu jalwinayaaye
- Kuman jalaqsan, kuman joogle, iyo kuman jamaamuura,
- Kuman jilicsan, kuman wada jaljalan, kuman jadeecaysan,
- Kuman jiiqle, kuman wada jabiyo, kuman jibaadaya,
- Intaasoo kun oo wada jiroo, wada jabaaqaaya,
- Ayaabay jimcaaloow naftiyo, kaba jareen ruuxda,
- Inatay iga jilaabeen ka badan, jaamacoow tima’e,
- Jabkii ay badeenbaa khalqigu, jaah wareeryahaye,
- Jarmal iyo itali iyo intii, yurubta jaalkeeda,
- Jeenyaha markii laysla dhacay, iyo jilibka baaciisa,
- Ee jawdu kala yeedhayee, jidanatay baaruudu,
- Ee jixinjixii laga tagiyo, judha walaalawga,
- Ee jiriqsigii dawladuhu, jaale dami wayday,
- Ee jiimis ina kaaratar, iyo joosaf diriraayay,
- Muslaiini joofkiyo wuxuu, ridayaay jaynaanka,
- Hidlarkii jiraabasaday wuxuu, ganayay jaajuuska,
- Al beeniya wixii lagu jibdhee, lagu jafee layaay,
- Seerbiyiyo xasuuqii jixnaday, carabta jaaxuunsan,
- Jeejniyo ruwaandiyo kuwii ,jawshka lagu qaaday,
- Midkasii xad-jira buu ahaa, kaan u soo jiraye,
- Jiibka iyo kaaruhu wuxuu, jala butaynaayay,
- Waxay jiiqda reenkiyo, shilkuhu jalaw yidhahdaanba,
- Hoobiyuhu wuxuu jiibiyuu, gubayay jiidhkooda,
- Baaruuda jolashiyo wuxuu, suugu jananaayay
- Dhishiikuhu wuxuu jalaw yidhuu, jarayay neeftooda,
- Sabankii jamuuxiyo, wuxuu miigu jiriqeeyay,
- Dubaabdku waatay jareen, ina janaaloowe,
- Diyaaradku waxay nagu jibdhaan, saanad kala jaada,
- Afantarigu wuxuu jiitamuu, mariyay jaantiisa,
- Faalkiyo badh jeexiyo ilaa, suuga jumuqeeya,
- Jalfistiyo waxay miidaiyo, xabadu jiidhaaba,
- Waatay na jawreen wax badan, janandoodiiye,
- Jaliilbaan ku dhaartee, kolnaba teelo may jirine,
- Car juuqdhaha, car soo jeestadii, lay jiljilosaaray,
- Wixii cago juglayn iyo ahaa, jawliskiyo cayda,
- Jidh-xunyahw wixii laygu yidhi, saaka uma jeedo
- Juj-uub kuma cabaanoo shimbiro, jaahil baad tahaye,
- Mar labaad miyaa laygu jiqi, jaraskii aan yaalay,
- Gobanimada waa loo jirwacay, loona jiidh go’aye,
- Jihad iyo dhibaa loo mariyo, jaxar colaadeede,
- Jabhad iyo kulbaa loo galiyo, jaan kastoo adage,
- Jam-jam may ku timid, awgayoow waan u soo jabaye,
- Sidii laba daloo jarahoo, nabad ku joogtawda,
- Ayaabaan jantee mayla jagi, waa janiyo nuure,
- Mise waan is jiid-jiidanaa, maba jukhawdaane,
Abwaan Cabdirasaaq Maxamad Cabdilaahi ( Oday)
Abwaanoday@hotmail.com 4015790/9127757