Virginia, 24 February, 2012 (SLpost)- Madaxweynihii hore ee maamulkii Siyaasad Barre isla markaana ahaa wasiirka Gaashaan-dhigga ee xilligaas Jeneral Maxamed Cali Samatar ayaa maxkamad hortood ka qirtay inaanu sii wadi karin dacwadda lagu haysto isaga oo qirtay inuu galay dambiyo dagaal.
Xukunkan maxkmadeed oo muddo todoba sanno ah ka socday maxkamadda Sare ee Maraykanka ayaa maalintii shalay ku soo gebo-gaboobay maxkamad Federaal oo ku taala gobolka Virginia ee dalkaas ka dib markii ninkii ay dacwaddu ku socotay oo ah General Maxamed Cali Samatar uu qirtay ku-luglahaanshiyaha dambiyo dagaal iyo meel-ka-dhaca xuquuq bani’aadam oo uu ka gaysatay dalka Somaliland sannadihii siddeetamaadkii, wakhtigaas oo uu ahaa wasiirka Gaashaan-dhigga iyo taliyaha Guud ee ciidamadii dawladdii kacaanka ee Soomaaliya.
Dacwadda Kiiska loo haysto Cali Samatar waxa ku oogey muwaadiniin Somaliland u dhashay oo dalkaas ku nool, kuwaas oo sheegay in ciidamada Cali Samatar maamulayey ay u geysteen jidh-dilka, kufsi, dhac, Xadhig, iyada oo mid ka mid ahi uu ka badbaaday xasuuqii laga geystay Xeebta Jaziira ee magaalada Muqdisho. Shakhsiyaadkan u dhashay Somaliland ayaa dacwadda kiiska Cali Samatar u gudbiyey maxkamadda ka dib markii ay ogaadeen inuu ku nool yahay Maraykanka, iyaga oo garabsanaya xeerka Torture Victim Protection Act oo sannadkii 2006 laga ansixiyey maxkamadda Sare ee Maraykanka si loo xaqiijiyo inaanu dalkaasi gabbood u noqon shakhsiyaad xasuuq iyo meel-ka-dhac xuquuqda bani’aadamka ka dhan ah ka geystay waddamadii ay ka yimaaddeen.
Muddadaas todobada sanno ah ee ay dacwaddu ku socotay, Cali Samatar waxa uu isku dayey inuu ka hortago xukun ku dhaca, waxaanu ku guul-darraystay hal mar oo kiiskiisa ay qaadaysay Maxkamadda Sare, laba jeer oo ka dambeeyey oo uu ku fashilmay Maxkamadda Rafcaanka ee Federal, waxaanu isku dayey inuu sameeyo isku-daygiisii ugu dambeeyey. Wakhti dambe oo ahayd habeenkii Axadda ee todobaadkii hore, waxa uu u gudbiyey maxkamadda inaanu haysan wax lacag ah oo uu isku difaaco, taas oo aan suurto-gal ka dhigteen inuu qabsoomo dacwadda todobaadkan loo ballan-sanaa.
Haseyeeshee, isku-daygaasi wuu fashilmay, sidoo kale. Maalintii Khamiista ee Shalay, waxa uu Cali Samatar Maxkamadda horteeda ka qirtay dacwadda dambiyada loo haysto. Intaas dabadeed, Xaakimkii maxkamadda oo ahayd haweenay lagu magacaabo Leonie Brinkema, waxay gudo-gashay dhegaystiga caddaymaha ka warramaya dambiyada uu qirtay ee lagu oogi doono.
Marka lagu daro caddaymaha laga helay dadka dhibbane-yaasha ah ee dacwadda ku soo oogey, Xaakimku waxa kale uu dhegaystay sarkaal ka tirsan ciidamada milatariga Maraykanka oo ka xog-bixiyey baaxadda ay le’egyihiin dambiyada dagaal ee Ciidamadii uu Cali Samatar Xukumayey ay geysteen. Sidoo kale, waxa caddaymo loo adeegsaday muuqaal Cajalad ah oo ka hadlaya lagaha dad la xasuuqay oo laga soo saarayo Xabaallo-wadareeyo iyo sidoo kale wariye BBC-da ka tirsan oo waraystay Cali Samatar isaga oo u sheegay inuu amray in ciidamadiisu duqeeyaan shacabka ku nool meelo dawaddiisa ka soo horjeeday. Waxaanu Cali Samatar hore u sheegay in waraysigaas BBC-du uu ahaa mid la been-abuuray.
Dhegaysida dacwaddan ayaa markii ugu horreysay noqotay tii ugu horreysay ee dambi xasuuq lagu helo Saraakiisha iyo Madaxdii xukunkii Siyaasad Barre, waxaanay tallaabadani uur-ku-taallo iyo deggenaan-sho la’aan ku abuuraysaa cid kasta oo lug ku lahayd dambiyo noocan ah.
Go’aanka ugu dambeeya ee dhibta uu geystay General Cali Samatar ayaa laga rejaynayaa inuu ka soo baxa Garsoore Brinkema Jimcaha maanta ama sida ugu dhakhsaha badan wixii maanta ka dambeeya.
SOMALILANDPOST NEWS
webmaster@somalilandpost.net