HURGUMO (GABAY)- W/C: Xiis Maxamed Cilmi (Shanfool)

Gabaygan Waxaa La Yidhaahdaa Hurgumo Waxaa Curiyay Abwaanka Da.Da Yar Ee Xiis Maxamed Cilmi (Shanfool) Gabaygan Hurgumo Wuxuu Ka Hadlayaa Taariikhda Halgankii Dib U Xoraynta Dalkan Somaliland Loo Soo Maray Isagoo Si Gaar Ah U Xusaya Bisha May Oo Ah Maalin Qiimo Badan Ugu Fadhida  Dalka & Dadka Reer Somaliland,

Gabaygan Hurgumo Wuxuu Ka Mid Yahay Gabayada Ugu Caansan Ee Loogu Jecelyahay Murtida Hal Abuurnimo Ee Abwaan Xiis Maxamed Cilmi.

Sidoo Kale Isaga Qudhiisa Ayaa Xusay Inuu Yahay Ahminka Fan Suugaaneedkiisa Ee Uu Sida Gaarka Ah Ugu Dhaato,

Gabaaygan Oo Aan Hore U Gelin War Baahinta Isagoo Qoraal Amaa Cod Duuban Ah Balse Abwaanku Wuxuu Xaflado Badan Ka Tiriyay Wakhtigii Uu Ololaha Xisbiga Kulmiye Ku Jiray

Xusbigaas Oo Uu Abwaanku Ahaa Taageerayaashii Xag Jirka Ahaa Ee Xisbiga Kulmiye Bilowgii Ilaa Dhamaadkii Ololayaasha Taageero Doon Aakhirkiina Ku Noqday Xisbi Muxaafida Oo Talada Dalka Qabtay Lagunaa Doortay Madaxweynaha Imika Talada Haya Axmed Maxamed Maxamuud (Siilaanyo).

Haddaba Gabaygan Wuxuu Abwaanku Curiyay 23kii May 2008 Maalin Jimce Ku Beegnayd, Waxaanu Yidhi Sidan Hoos Ku Qoran.

1. Markay hugunto xaajadu ragbaa haamo buuxsada,e.
2. Nin hal qudha adduunyaba lehoo haynta kaligeed ah.
3. Haddii ay hadaan kaga dhacdoo halaq kasoo jeesto.
4. Hamaasade libaax iyo dhurwaa lagu hareereeyo.
5. Hogga ugu badheedh iyo si kale hawl u fuliyaaba.
6. Wuxuu horre gadaal dibu u socod hilinka jeesjeesto.
7. Ama gogosha laalaadsho uu hoosta ka gunuuso.
8. Hanfi iyo wuxuu gaajo maro amase haydaaro.
9. Mar uunbuu hantiyi geesigii aan heddii geline.
10. Hawl yari kumuu iman dalkani dib u haleelkii.
11. Ragbaa hilib dalqaha kula xarbiyay horor liqiisiiye.
12. Hub la riday dagaal hooto waran laysku hadateeshay.
13. Haab shidan hilaac qiiq watoo aradku huuboobay.
14. Halis dhagara hadalkoo la jaray hoosna laga shawray.
15. Hamad go,ay haraatidi ku tiil hebel gartii sheegtay.
16. Halyay lee’day haadkoo ku shiray hilib la googooyay.
17. Habaar ooy dulmigi hara jabee hooyga lala jiifay.
18. Hujuun nacab hantida shacab la dhacay oo la halan beeyay.
19. Qoys nabad ku hoydoo mar qudha hobiye baabiiyay.
20. Hebel sheeg halkeebuu jiraa hooyo lagu toogtay.
21. Hangash iyo basaasiin bulshada duuba hadalkooda.
22. Holi xamar hargaysana duqee haaruf lagu jiidhshay.
23. Habar habarti loo kala jabiyo haaligii caddowga.
24. Hayaay iyo tolaaydii dhacdee layska hadhi waayay.
25. Halkan dega hadhoowtana ka guur maati habaqlaysay.
26. Hirig mari qaxoontiga haligan maxas haraad laayay.
27. Hiirtaanyo nagu raagtay iyo nabaro haaraystay.
28. Hunguftiga cadaawuhu wuxuu nagu hantaaqeeyey.
29. Hoog iyo cadaabtii ifkee laantu halasowday.
30. Wixii hagar la,aan laygu muday daalabta haliisha.
31. Halgan adag hurgumo doogatoo layska hadhi waayay.
32. Intaas oo is wada haysatoo hayb-na wada gaadhay.
33. Ayay helida MAY ay ku timi hadiyad may hayne.
34. Diricyaan habeen seexan jirin oo hudda u galaye.
35. Qaarbaa ku hoobtoo u tegay hooygi aakhiro,e.
36. Harag waafi mee iyo lixliyo hanadadii guushu?.
37. Inta geesi hadow jiidhay ee soo habqamo jeexday.
38. Halyay-nimadi ina biixi iyo hiilki dhega weyne.
39. hal adaygi wayso cadde iyo hilin wadaagtiisa.
40. Waa haybe laanbade kuwaan lagu hungoobaynin.
41. Xasan ciise iyo heegankii huuga wada tuuray.
42. wuu haybad badanyee tolwaa halacyo dhiirdhiiran
43. Ha hilmaami karo maxamed cali hoonki uu tumaye,
44. Hanaankiisa ina kaahinbaan cidi hilmaamayne.
45. Hogaansamaha siilaanyo iyo hanadyo maamuus leh.
46. Tuurkii hufnaayee isagu libinta soo haabtay.
47. Iyo boqol kaloo hagar la,aan hawlo fulinaayay.
48. Ayaa hurin dagaal kaga dhacsaday halaqi waagaase.
49. Hadday heeg wax qabanayso ooy cid u hanbaynayso.
50. Hogga lagu cadaab moorganbaa lagu horayn-laaye
51. Cali samatar haariga dhul kale ma hindiwaaseene.
52. Intoo la hantiyaabuu xabsiga hoodh ku noqonlaaye.
53. Wuxuu shacab haween iyo labood hawsha wada qaato.
54. Hawraarsanaantii SNM haybad lagu gaadhye.
55. Hirdankii macaashkuu dhalaan ku hadhsanynaaye.
56. Taan shalay hogaanka u jaray way si hafaysaaye.
57. Halaaggi igu dhacay shalay hadduu xamarna haaystaaaye.
58. Nabsigay hulaabteen wakaa toodi heensadaye.
59. cuqubadi hadhuub dhaaftaybay la hetinysaaye
60. Hareeraha aduunyadaa haddii layga wada hiisho.
61. Ama hadafka Somali weyn laygu gacan haadsho.
62. Hayinkaygu inu koonfur tago waan la heli hayne.
63. Ninkaa taa u himiloonayooy waa hadh kaa tegaye.
64. Waa hees walwaaleed ninkii huursi sugayaaye.
65. Ninka tiin hadh qoodaar ku riday hoyga dhinaciisa.
66. Timir haabka kuma sii ritiyo gurasho hoobaane.
67. Tus hilaacay hogol curatayoo hoos usoo lulata.
68. Hoogaansi mayay hoorayoo heego daba joogto.
69. Heemaalka wayskaga egnahay hiimse hiimsaha’e.
70. Hoosta iyo guudkaba ka jira teenu waa hodane.

DHAMAAD