Hargeysa (SLpost)- Masuuliyiinta ugu sarreysay Xisbiyada KULMIYE iyo WADDANI, ayaa shacabka Somaliland ka tacsiyadeeyay Geerida naxdinta leh ee ku timi mid ka mid ah mujaahidiyiinta dhifta ee dalka Marxuum Maxamed Biixi Caalin (Ooto Biixi) oo maanta ku geeriyooday Cusbitaalka Edna Aadan ee magaalada Hargeysa.
Alle Ha u naxariistee Mujaahid Maxamed Biixi Caalin (Ooto Biixi) oo muddooyinkii u dambeeyey cusbitaallo kala duwan oo dalka gudihiisa iyo dibaddiisa u jiifay xannuun ka haleelay beerka, ayaa ka mid ahaa haldoorka mujaahidiinta dalka, isla markaana si weyn looga yaqaanay guud ahaan waddanka, gaar ahaan magaalada Hargeysa.
Haddaba, war-qoraallo kooban oo ka soo baxay xafiisyada labada xisbi oo ay ku muujiyeen murugada ay ka qabaan geerida ku timi mujaahidka, oo loogu talo-galay war-baahinta ayaa loo soo kala gaadhsiiyey sidan hoos ku xusan:
Ugu horeyn, war-qoraal kooban oo ka soo baxay xafiiska guddoomiyaha Xisbiga Kulmiye, Md Muuse Biixi Cabdi, ayaa u qornaa sidan:- “Guddoomiyaha xisbiga Midnimada iyo Horumarka Jamhuuriyadda Somaliland ee KULMIYE, ahna murrashaxa madaxweynaha ee xisbiga Md. Muuse Biixi Cabdi waxa uu tacsi tiiraanyo leh u dirayaan qoyska, qaraabada, ehelada iyo guud shacabka Somaliland ee uu ka baxay Alle ha u naxariistee Marxuum Mujaahid Maxamed Biixi Caalin (Ooto) oo ku geeriyooday magaalada Hargeysa maanta oo taariikhdu tahay 05/06/2017.
Guddoomiyaha KULMIYE waxa uu ku tilmaamay Marxuum Maxamed Biixi Caalin (Ooto) ku tilmaamay mujaahid naftiisa iyo dhiiggiisaba u soo huray dib-u-xorayntii dalka iyo dadka reer Somaliland oo ka baxay qaranka maanta, isla markaana ka qaybgalay halgannadii hub-ka-dhigista iyo dib-u-heshiisiintii beelaha Somaliland.
Guddoomiyuhu waxa uu Marxuumadda Alle uga baryayaa inuu jannadiisa Firdowsa ka waraabiyo, qoyska, qaraabada, shacabkana uu Samir iyo Iimaan Saadiq ah ka siiyo. Aamiin….Aamiin….Aamiin.” Sidaaas ayaa lagu sheegay war-qoraalka Xusbiga KULMIYE kaga hadlay geerida Marxuumka.
Sidoo kale, war-qoraal ka soo baxay xafiiska warbaabinta ee xusbiga WADDANI, ayaa u qornaa sidan:- “Guddoomiyaha Golaha Wakiilada Somaliland ahna Murashaxa MadaxweynahaXisbiga WADDANI Dr.Cabdiraxmaan Maxamed Cabdillaahi (Cirro) oo ku hadlaaya magaciisa, ka xildhibbaanada golaha Wakiilada, hoggaanada, guddiyada fulinta, garabbada dhallinyarta iyo haweenka iyo taageerayaasha Xisbiga WADDANI ee kala jooga gudaha iyo dibadda dalka, wuxuu tacsi tiiraanyo leh u dirayaa guud ahaan shacabka Somaliland isaga oo ka tacsiyadeynaaya geeridii naxdinta lahayd ee ku timi Alle ha u naxariistee Marxuum Mujaahid Maxamed Biixi Caalin (Ooto) oo maanta 5/06/2017. ku geeriyooday Magaalada Hargeysa.
Dr.Cabdiraxmaan Cirro, wuxu sidoo kale tacsi u dirayaa ehelkii, qaraabaddii, qoyskii iyo caruurtii uu ka baxay marxuum Mujaahid Maxamed Biixi Caalin (Ooto) isagoo ku sifeeyey Marxuumka inuu ahaa Mujaahid ka soo qayb-qaatay halgenkii dib u xorreynta dalka iyo dib u heshiisiintii –beelaha Somaliland,
Guddoomiye Cabdiraxmaan Cirro wuxuu tilmaamay inuu Marxuum Ooto Biixi Caalin ahaa shakhs helyey qaran oo la tebi doono. Inaa Lillaahi Waa Inaa Ilayhi Raajicuun.” Sidaas ayaa lagu sheegay war-qoraalka WADDANI ee xambaarsan tacsida geerida marxuumka.