Waxaa maanta la soo gabagabeeyay wareega kowaad ee isreeb reebka tartanka gobolada Somaliland qaybtii ka socotay Xaaji Daahir Stadium ee magaalada Boorama kadib markii kulamadkii ugu danbeeyay galinka hore loo badalay si looga hortago rabashado la mid ah kuwii dhacay kulankii Maroodi Jeex iyo Awdal. Kooxda xulka gobolka Saaxil ayaa guul 2:1 ah ka gaadhay kooxda Salal, waxayna guushaasi kooxda gobolka saaxil ka caawisay inay u soo baxdo wareega sideed dhamadka tartanka gobolada Somaliland, Sida aannu idiinku soo gudbinay qodobkii hore ee Somalilandpost ciyaartan kaga faalootay. Waxa sidoo kale kooxda gobalka Hawd ay barbaro 1:1 ah la gaashay kooxda gobalka Buuhoodle.
Kooxda gobolka Hawd ayaa u soo baxday wareega sideed dhamaadka tartanka gobolada Somaliland kadib markii ay barbaro 1:1 ah la gashay kooxda gobalka Buuhoodle. Hawd ayaa kaalinta labaad kaga soo baxday Group A halka kooxda gobolka Awdal ay kaalinta kowaad kaga soo baxday. Kooxaha Maroodi Jeex iyo Buuhoodle ayaa tartanka gabi ahaanba ka hadhay.
Hawd ayaa kulankan ciyaaraysay iyada oo saddex dhibcood ka heshay kulankii ay Maroodi Jeex guusha wayn ka gaadhay halka ay hore guuldaro ugala soo kulantay kooxda gobalka Awdal, sidaa daraadeed kooxda gobalka Hawd ayaa barbaro kaliya kulankan uga baahnayd si ay wareega sideed dhamaadka u soo gaadho.
Laakiin buuhoodle oo guuldaro kala soo kulantay kooxda gobalka Maroodi jeex isla markaana barbaro la soo gaashay kooxda gobolka Awdal ayaa kulankan ku qasbanayd inay guul gaadho si ay rajadeeda, waxayna buuhoodle kulankan ciyaaraysay iyada oo leh hal dhibic oo kaliya waxayna sidoo kale Buuhoodle u baahnayd inay ugu yaraan laba gool iyo wax ka badan guul ku gaadho si ay ugu soo baxdo wareega sideed dhamaadka.
Sidaa daraadeed kooxda gobolka Buuhoodle hawl badan ayaa kulankan u taalay halka kooxda gobalka hawd ay ahayd kooxd ugu cad cad ee la filayay inay u soo baxayso wareega sideed dhamaadka.
Kulankan ayayna qaybta hore ee ciyaarta Hawd iyo Buuhoodle midna u suurto galin inay wax goolal ah la yimaadaan taas oo cadaadis dheeraad ah ku kordhisay kooxda gobalka Buuhoodle oo ay rajadeedu sii yaraanaysay marka uu waqtigu socdaba, waxaana qaybta hore ee ciyaarta lagu kala nastay barbaro gool la’aan ah.
Markii layskugu soo laabtay qaybtii danbe ee ciyaarta ayay Buuhoodle doonaysay inay ciyaarta wax ka badasho, waxayna qaybta danbe ku bilaabatay weerar badan laakiin difaaca kooxda gobalka Hawd ayaa muujiyay adkaysi badan, waxayna iska badbaadiyeen haliso badan.
Laakiin ciyaarta oo dhamaad ah ayay kooxda gobalka Hawd heshay goolka ay niyadda kaga jabisay kooxda gobalka Buuhoodle, waxaana gool qurux badan oo madax ah Hawd udhaliyay Caadil oo weerarka ugu bilawday kooxda gobalka Hawd, waxayna ciyaartu noqotay 1:0 ay kooxda gobalka Hawd hogaanka ciyaarta kula wareegtay.
Laba daqiiqo oo kaliya kadib ayey kooxda gobalka markeeda heshay goolka ay kula timid barbaraha laakiin Buuhoodle ayaa goolkan la timid daqiiqadii 90 aad ee dhamaadka ciyaarta taas oo wali looga baahnaa inay goolal kale la timaado, waxayna ugu danbayn ciyaartu ku dhamaatay barbaro 1:1 ah, waxaana sidaa wareega sideed dhamaadka tartanka gobolada Somaliland ugu soo baxday kooxda gobalka Hawd.
Natoojooyinkii Group A: Awdal, Maroodi Jeex, Hawd, Buuhoodle
Waxaa Group A ka soo baxay kooxaha goblada Awdal iyo Hawd, halka Maroodi Jeex iyo Buuhoodle ay ka hadheen.
Kulamadii Awdal uu ciyaaray:
Awdal 1:0 Hawd
Awdal 1:1 Buuhoodle
Awdal 0:1 (iyada oo aan ciyaartu dhamaan ayaa lays khilaafay oo rekoodhe Awdal loo dhigay ayaa khilaaf keenay, Maroodi jeexna tartanka ayaa laga reebay halka saddexda dhibcood ee kulankan la siiyay Awdal)
Kulamada Madoodijeex uu ciyaaray
M.jeex 3:2 Buuhoodle
M.Jeex 1:3 Hawd
Maroodi Jeex 1:0 Awal (iyada oo aan ciyaartu dhamaan ayaa lays khilaafay oo rekoodhe Awdal loo dhigay ayaa khilaaf keenay, Maroodi jeexna tartanka ayaa laga reebay)
Kulamada Hawd uu ciyaaray
Hawd 0:1 Awdal
Hawd 3:1 M.Jeex
Hawd 1:1 Buuhoodle
Kulamadii uu Buuhoodle ciyaaray
Buuhoodle 2:3 Maroodi Jeex
Buuhoodle 1:1 Awdal
Buudoodle 1:1 Hawd
Somalilandpost, Hargeisa Ofiice.