Hargeysa (SLpost) – Madaxweynaha Jamhuuriyadda Somaliland, Mudane Muuse Biixi Cabdi, waxa uu maanta xafiiskiisa ku qaabiley wefti balaadhan oo ka socday dalka Faransiiska oo uu hoggaaminayey safiirka dalalka Somaliland iyo Soomaaliya u qaabilsan, Amb. Antoine Sivan, oo ay wehelinayeen xubno kale oo muhiim ah.
Madaxweynaha Somaliland, Mudane Muuse Biixi waxa uu weftiga ku bogaadiyey boqashada ay ku yimaadeen Somaliland, waxaanu warbixin dheer ka siiyey xaalada guud ee dalka, iyo taariikhda Somaliland, isagoo u sharaxay hanaanka geediga horumarka, nabadgelyada, iyo dimuquraadiyadda Somamliland ku tallaabsatay, isla markaana waxa uu madaxweynuhu u caddeeyey weftiga mawqifka gooni isu taagga Somaliland, isagoo u soo jeediyey in dalka faransiisku gacan ka geysto sidii Somaliland aqoonsi buuxa uga heli lahayd caalamka.
Geesta kale madaxweynuhu isagoo ka duulaya doorka iyo dedaalka xukuumadiisu ugu jirto dar-dargelinta hawlaha qaranka wuxuu u sharxay qorshaha shanta sanno ee soo socda, oo ay qayb ka yihiin shaqo abuurka dhalinyarada, iyo horumarinta arrimaha bulshada.
madaxweynuhu waxa uu ka dal baday hay’adda mucaawimooyinka u qaabilsan dalka faransiiska ee loo soo gaabiyo (AFD) ay xafiis ku yeelato Somaliland, kuna soo biirto sanduuqa horumarinta dhaqaalaha Somaliland ee (SDF), ayna ka taageeraan Somaliland, sidii loo horumarin lahaa wax soo saarka khayraadka baddaha.
Sidoo kale madaxweynuhu wuxu u bandhigay weftiga xaaladda abaareed ee ka soo cusboonaatay xeebaha iyo gobolada dalka, waxaanu ku adkeeyey sidii ay gacan uga geysan lahaayeen duruufta abaareed, isagoo ku wargeliyey in horraanta sanadka 2019ka ay dalka ka qabsoomi doonaan doorashooyinka golayaasha wakiilada iyo deegaanka.
Ugu danbayn waxa uu madaxweynuhu weftiga u sheegay in wada-hadalladii hore u dhex maray Dalalka Somaliland iyo Soomaaliya dib loo bilaabi doono, Somaliland-na ay door bidayso in wadan dhex-dhexaada lagu qabto wada hadalada labada dhinac.
Weftiga dalka faransiiska ayaa dhinacooda madaxweynaha uga mahadnaqay sida qiimaha leh ee uu u qaabilay, ugana warramay xaaladda guud ee dalka iyo qorshaha xukuumadiisa ee shanta sano ee soo socda, iyagoo ballan qaaday inay dhamaan wixii shirkaasi lagaga wada hadlay kula noqon doonaan dalkoodii, sida ugu dhakhsaha badana ay uga soo jawaabi-doonaan. Waxaanu kulankaasi ku soo dhammaaday guul iyo is-afgarad buuxa.
Madaxweynaha Waxa kulanka Kala qaybgalay Madaxweyne ku xigeenka Somaliland, Mudane Cabdiraxmaan Cabdilaahi Ismaaciil (Saylici) iyo Wasiirka Arrimaha Dibeda Somaliland Dr. Sacad Cali Shire
Xubnaha Weftiguna waxay ka koobnaayeen
- Safiirka Faransiiska u qaabilsan Dalalka Somaliland iyo Soomaaliya Amb. Antoine Sivan,
- Emmanuel Dagon
- Colonel Ducharme,
- Abdehnor Brahmi
- Jean Pierre Tutin
ALLAA MAHAD LEH
Maxamuud Warsame Jaamac
Af-hayeenka Madaxweynaha JSL