Hargeysa (SLpost)- Alle ha u naxariistee waxaa maanta si heer Qaran ah loogu aasay Magaalada Hargaysa Marxuun Faysal Cumar Mushteek oo ka mid ahaa Foolaadkii Fanka Soomaalida.
Aaska Marxuunka waxaa ka qayb galay Wasiirada Warfaafinta, Kalluumaysiga, Dhalinyarada iyo Ciyaaraha,Gudoomiyaha Xisbiga Kulmiye, bahda Fanka iyo Dadweyne aad u tiro badan.
Madaxdii iyo Fanaaniintii ka qayb galay Aaska Marxuunka ayaa si qoto dheer uga sheekeeyay taariikhdii uu Marxuun Faysal Cumar Mushteek ka soo qaatay Waxbarashada iyo Fanka iyagoo tilmaamay in marxuunku uu ka mid ahaa labeentii Waxbarashada Somaliland isla markaana uu macallin ka noqday deegaamo badan oo ka mid ah dhulka Somaliland iyo meelaha ay degaan dadka ku hadla Luuqada Soomaaliga .
Waxaa kale oo ay ka warrameen doorkii, Rabbi ha u naxariistee, Marxuun Faysal Cumar Mushteek ka soo ciyaaray isbeddeladii uu ku tallaabsaday Fanku, isaga oo Marxuunku ka mid ahaa shakhsiyaadkii faro ku tiriska ahaa ee aqoonta fanka ku soo bartay Wadamada Masar iyo Jarmalka.
Alle ha u naxariistee waxa uu marxuunka lagu xasuustaa sidii uu heelada Soomaaliga ugu soo kordhiyay codadka caan baxay ee Qaraamiga,
Gudoomiyaha Xisbiga Kulmiye Md,Muuse Biixi Cabdi oo ka hadlay waxa uu ka xasuusto taariikhda marxuunka ayaa sheegay inuu u ahaa macalin, isla markaana ku tilmaamay shakhsi u dhashay wadaniyad,cod kar, iyo kaalintii uu ka soo qaatay halgankii dib u xoraynta wadanka ,Waxaanu tacsi u diray Qoyskii,Qaraabadii iyo Guud ahaan Shacbiga Somaliland ee uu ka baxay alle ha u naxariistee Marxuun Faysal Cumar Mushteek.
Sidoo kale Wasiirada Wasaaradaha Kalluumaysiga Mudane C.laahi Jaamac Cismaan (Geel Jire), Dhalinyarada iyo Ciyaaraha Mudane Cali Siciid Raygal ,Warfaafinta Mudane Abiib Diiriye Nuur “Timacad” ayaa Marxuunka ku sifeeyay qof ay muuqato wixii uu dalkan iyo dadkiisaba u soo qabtay,iyagoo intaas ku daray inuu ahaa aqoon yahan iyo macallin cilmiga waxbarasho ee uu soo bartay ay ka faa’iideen Siyaasiyiin badan oo dalka iyo dibadiisaba ku sugan.
Sheekh Aadan Xaaji Maxamud Xiiray “Aadan Siiro”ayaa Marxuunka eebe uga baryay inuu naxariistiisii jano ugu deeqo.
Waxaa kale halkaasi ka hadlay abwaano ay ka mid yihiin Xasan Xaaji Cabdilaahi Xasan Ganey,Cabdi Aadan Xaad (Cabdi Qays), Axmed Saleebaan Bide, Fanaanadda caanka ah ee Faadumo Cabdilaahi Kaahin (Maandeeq), aqoonyahano iyo waayeel kale, oo sheegay in bahda Fanka ka baxay mid ka mid ah tiirarkii waaweynaa ee uu ku taagnaa.
Waxaa kale oo ay sheegeen in Marxuun Faysal Cumar Mushteek aad looga jeclaa heesihiisa dunida Carabta isagoo heeso badan ku qaada Luuqada Carabiga isla markaana uu saaxiib dhaw la ahaa Fanaaniinta Sayid Khaliifa Maxamed Wardi, Saalax Ibnu Baadiye iyo kuwo kale.
Waxaanay Rabi uga baryeen inuu naxariistiisa Jano ugu deeqo,Qoyskii, Qaraabadii,bahda Fanka iyo Shacbiga Somaliland uu ka siiyo Samir iyo Iimaan.
Dhinaca kale, Madaxweynaha Somaliland Md Axmed Maxamed Maxamuud Siilaanyo, ayaa bahweynta Fanka iyo Sugaanta, qoyskii, qaraabadii iyo shacbiga Somaliland ka tacsiyeeyay geerida Rabbi naariistii Janno ha ugu deeqee Marxuum Faysal Cumar Mushteek, waxaanu Eebbe uga Baryey Marxuumka inuu naxariistii Janno ka waraabiyo, Bahweynta Fanka iyo Suugaanta, Ehelkii, Qaraabadii, Asxaabtii, Qoyskii iyo Dhamaan Shacbiga Reer Somaliland ee uu ka baxayna Samir iyo Imaan ka siiyo.