London (SLpost)- Guddoomiyaha Xisbiga UCID Eng Faysal Cali Waraabe, ayaa sheegay in dawladnimadu tahay wax la wada leeyahay, isla markaana ay Somaliland meel fiican marayso, wax badanina ka dhiman yihiin.
Guddoomiye Faysal oo ka hadlayey munaasibad ballaadhan oo taageerayaasha xisbigu ku soo dhaweeyeen masuuliyiin uu ka mid yahay, waxa uu sheegay in Somaliland xilligan baahan tahay in la kala saaro reeraha iyo dawladnimada oo dawladnimada laga sarraysiiyaa qabiil kasta, balse aanay noqon wax qabaa’illo gaar ahi ku maamulaan inta kale ee wax la leh.
“23 sano ayaynu dawlad nahay, Magaaladeenna Caasimadda ah ee Hargeysa saddex Mishiin oo Laydh baa ka shaqayn jiray, oo laba uu Marxuum Cigaal dhigay, midna Ismaaciil Cumar Geelle inna siiyey baa ka shaqayn jiray isbeer la’aan bay u fadhiisteen oo dam u noqdeen, markaasay ku leeyihiin waddada Ceerigaabo ayaannu dhisaynaa, waar aad dhistaane horta Hargeysa maad Siraaddid? Magaalada Hargeysa saddex meeloowoow laba meelood biyo malaha, boqol iyo afartan Doollar baan ka bixiyaa biyaha bishii waana keligay iyo afar shaqaale ah.” Sidaa ayuu yidhi Guddoomiyaha UCID Eng. Faysal Cali Waraabe.
Guddoomiyaha UCID Eng. Faysal waxa uu sheegay in wax badani ka dhiman yihiin Somaliland, isla markaana hadduu isleeyahay 23 sano ka dib Somaliland sidan bay ahaanaysaa inaanu siyaasaddaba galeen, waxaanu yidhi; “Waxa la cashuuraa Islaamaha Bacadka fadhiya ee dallaalimada lahayn, waa lagu qayilayaa, Gawsuhu idinka dhece ayaan ku idhi! Waxa weeyaan wax badan baa innaga dhiman, haddaan isleeyahay 23 sano sidaas ayay ahaanaysaa Somaliland Siyaasad-ba maan galeen ee Carruurtaydaan iska dhaqan lahaa. Waan ka xumahay inay sidaa wax yihiin. Haddana dalkii waynu haysannaa waxaynu u baahannahay dawlad wanaagsan iyo caddaalad.”
Faysal Cali Waraabe waxa uu sheegay in Somaliland waxyaabaha ay ku faanto ee dhismeheeda lagu guulaystay ay ka mid ahayd Saxaafadda madaxa-bannaan ee Somaliland ka hana-qaadday, hase ahaatee, ay Xukuumadda Madaxweyne Siilaanyo cabbudhin, xadhig iyo xayiraad kula kacday, taasina ay tahay ceeb dhaawacday sumcaddii iyo karaamadii ay Somaliland caalamka kulahayd.
SOMALILANDPOST.NET
contact@somalilandpost.net