Waxaan dhammaan wada ognahay inay bulshooyinka kala duwan meel kasta ha joogaan inay caadooyinka iyo camalada ay leeyihiin u gudbiyaan jiilalkooda soo koraaya. Maanta waxaad arkaysaa bulshadeenii oo caadooyinkaas kuwii ugu qiimaha badnaa ee ay noloshu aadka ugu tiirsanayd ka haajiraya. Falashada beeruhu waa aasaaska quud iyo dhaqaale ee bulsho kasta meelkasta haku noolaatee. Inaan xoogga saarno oo aan wax beerano waa mid aad waxtar ugu yeelanaysa nafteena iyo ta jiilalka soo koraya. Haddaan wax beerano waxaan hirgalinaynaa hadaf haqab tir ku salaysan innaga iyo aayaha ubadkeena. Si kastaba ha ahaaatee, haddaan daryeelno xirfadaha wax-beeris ee aynu soo dhaxalnay muddo dheer waxaan horseedi karnaa is bedel aad u wayn oo ku sar go’an hadba baahida dalka gudihiisa taala. Dalkeenu wuxuu hodan ku yahay badarka( gallayda, digirta, garowga etc), khudrada noocyadeeda kala duwan iyo waliba midhaha aadka u macaan kuwooda ugu caansan adduunka.
Inaan dhiiri-gelino oo aan wax beerano kaliyaata inagama caawinayso inaan macaluul wajahno balse waxa ay ku u qaadi kartaa koboca dhaqaale iyada oo aan u dhoof geyn karno dalagga dheeriga ah wadamada aan jaarka nahay iyo gabi ahaanba adduunka oo dhan. Bal hal daqiiqo ka feker is-bedelka dhaqaale ee aan samayn lahayn haddii aan dhoofin lahayn galayda iyo digirta iyada oo maanta ku bixino in ka badan 10% miisaaniyadda dhaqaale ee dalka sannadkii? Inaan dhaqaale intaas leeg ku bixino wax-soo saar dalkale waxa ay inaga bixinaysaa sawir aad u fool-xun oo wax u dhimaaya horumarka dhaqaale ee dalka iyo waliba kartida wax soo saar ee muwaadiniinta dalka.
Bal dib u milicso taariikhda faca wayn ee aadamaha. Waxaad ka dheehan kartaa in aadamuhu beero qotay si uu u badbaado isuna horumariyo. Runtii beero falashadu waa ubucda dhex-taalka ah jiritaanka, horusocodka, hamiga iyo waliba hiigsiga fog ee badhi-taaraya in wax la beerto oo laga maarmo in lagu tiirsanaado wax-soo saar dad shisheeye.
Haddaba si aan uga badbaadno ku tiirsanaantaas, waxaa aad u qaaliya inaan ogaano awooda Alle ina siiyay iyo damiirka ka damqanaaya inuu sugo dalagga laga soo gooyo dal kale iyada oo maanta aynu mararka qaarkood haysano dhul ka wayn dhulalka wax laga beerto waddamada adduunka qaar kamid ah. Tan,waxaa gabi ahaanba lagu xallin karaa. Marka koowaad, in la dhiiri-geliyo beeralayda dalka oo laga caawiyo dhammaan qalabka beerista. Labaad, in la balaadhiyo dhulka wax laga beerayo iyo waliba noocyada midhaha iyo khudradda ee laga soo saaro waddanka. Ugu danbayn, waxaa lagama maarmaan ah in la dardar geliyo wasaaradda beeraha iyo waliba waaxyaha kala duwan ee xooga saara kobcinta beeraha si loo soo saaro shuruuc mamnuucaya dalagyada shisheeye iyaga oo ay dawladdu sare u qaadayso sicirka dalagyadda shisheeye iyada oo isla markaana hoos loo dhigayo sicirka raashinka dalka kasoo go’a.
Haddaan beerano wan badbaadaynaa..
W/Q: Mohamed Rashid Hussein
Social Worker, Sustainable Development Practitioner.
Phone Number: 252-63-4002027
Email: mohamedrashid402@gmail.com