Hargeysa, (SLpost)- Guddoomiyaha Golaha Wakiiladda Somaliland ahna Guddoomiyaha Urur siyaasadeedka Wadani Md. Cabdiraxmaan Maxamed Cabdilaahi (Cirro), ayaa maanta si weyn loogu soo dhaweeyay magaalada Hargeysa ka dib markii uu ka soo laabtay socdaal shaqo ah oo qaatay muddo bil ku dhowaad ah oo uu ku tagay dalalka Ingiriiska iyo Imaaraadka Carabta.
Guddoomiyaha Wakiiladda ahna Hoggaamiyaha Urur siyaasadeedka Wadani, oo markii uu maanta ka soo degay madaarka Hargeysa ay si diiran ugu soo dhaweeyeen Guddoomiye Ku xigeenka koowaad ee Golaha Wakiiladda Md. C/Casiis Maxamed Samaalle, Ku simaha duqa caasimadda ahna Maayar Ku xigeenka Hargeysa Md. Maxamed Cabdilaahi Uurcadde, Xildhibaano tiro badan oo ka tirsan Aqalka Wakiiladda, salaadiin, Cuqaal, masuuliyiinta urur siyaasadeedka Wadani iyo Boqolaal ka mid ah taageereyaasha ururkaasi ee magaaladda Hargeysa nool.
Guddoomiyaha Golaha Wakiiladda ahna Hoggaamiyaha Urur siyaasadeedka Wadani Md. Cabdiraxmaan Maxamed Cabdilaahi [Cirro] oo qolka nasashada ee madaarka Hargeysa kaga war-bixiyay socdaalkiisii dalalka Imaaraadka carabta iyo Ingiriiska. Intaasi ka dib waxa Guddoomiyaha oo ay wehelinayeen gaadiid aad u tiro badani u soo galbiyay xarunta ururka wadani ee magaalada Hargeysa halkaasi oo uu khudbad uga jeediyay Taageereyaasha ururkaasi.isagoo hadalkiisa ugu horeyn ku bilaabay sidan“Walaalayaal, Mudaneyaal iyo Marwooyin, shacbiga Somaliland ee reer Hargeysa waxaan halkan uga soo jeedinayaa mahad naq aad iyo aad u balaadhan oo qalbiga ka soo go’day sidii wanaagsanyd ee ay ii soo dhaweeyeen maanta haddii ay yihiin Salaadiin, cuqaal, Xildhibaano, Madaxda, masuuliyiinta iyo Taageereyaasha ururka Wadani. Waxa kale oo aan u mahad naqayaa madaxda iyo ururkii Iftin. Markaan warka soo kobo halkan waxaan ka baxay anigoo ka wakiil ah ururka Wadani si aan uga qeyb galo wanqal loo sameynay laanta UK ee ururka Wadani.”
Guddoomiyaha urur siyaasadeedka Wadani waxa uu sheegay inuu dalka Ingiriiska kula kulmay masuuliyiin badan oo ka tirsan dalka Ingiriiska, isagoo arrintaasi ka hadlayayna wuxuu yidhi “Waxaan intii aan joogay dalka Ingiriiska aan la kulmay masuuliyiin ka tirsan dawlada Ingriiska,waxaan masuuliyiintaasi uga waramay xaalada Somaliland marayso. Dimuqraadiyadda aadna way u bogaadiyaan.waxay masuuliyiintii aan la kulmay oo ka tirsan labada aqal ee baarlamaanka Ingiriiska taaageero buuxda ayay u fidiyaan Somaliland.”
Guddoomiye Cirro oo hadalkiisa sii wataa waxa uu yidhi “Waxa kale oo aan kala hadlay xidhiidhka ay la leeyihiin Baarlamaanka Somaliland waxaanay noo xaqiijiyeen in Somaliland ay ka soo qeyb gasho shirarka iyo tababaradda ururka ay leeyihiin dalalka ku midoobay barwaaqo sooranka inkasta oo aynaan xubin rasmi ah ka ahayn, haddana waxay inoo xaqiijiyeen inaynu ka qeyb geli doono dhammaan kulamadoodda iyo tababarradda ay sameeyaan”.
“Waxaan ugu bushaareynayaa shacbiga Somaliland iyo taageereyaasha Wadaniba in hawshii ay ii direen si wanaagsan iyo guul ku soo dhamaatay,”ayuu yidhi Guddoomiyaha Urur siyaasadeedka Wadani.
Guddoomiyuhu wuxuu sheegay in ururada cusub ee dalka laga furay ay calaamad wanaagsan u yihiin heerka dimuqraadiyadda dalku marayso “Ururadda badan ee la furay runtii waxay yihiin calaamad wanaagsan oo dimuqraadinimo waana calaamad caafimaad qab dimuqraadiyadeed. Jaaliyadaha Somaliland ee aan kula kulmay Ingiriiska iyo Imaaraadka carabtuba waxay soo jeediyeen in xoogeena iyo midnimada ummadda Somaliland la isu geeyo oo laga bilaabo inay ururaddu isu tagaan si aynu u helno xisbiyo qaran oo saldhigoodu balaadhan yahay,”ayuu yidhi Guddoomiyuhu.
Md. Cabdiraxmaan Maxamed Cabdilaahi wuxuu sheegay inay diyaar u yihiin inay la hadlaan ururada ay isku afkaarta dhow yihiin, waxaanu yidhi “Urur siyaasadeedka Wadani wuxuu u sheegayaa ummadda reer Somaliland iyo jaaliyadaha dibadaba inuu soo jeedintooda iyo talladoodaba aqbalay, waxaana taasi marag u ah inay ururka Wadani ay iskaashadeen Urur ka mid ah ururadda cusub oo ah Iftiin. Waxa kale oo aanu diyaar u nahay inaanu ururada aanu isku mabaadi’da dhow nahay isu nimaadno oo xoogayaga isku geyno iyo urur kasta oo diyaar u ah tallaabadan oo kale ahba.”
Guddoomiyuhu wuxuu si weyn ugu mahad celiyay Jaaliyadda Somaliland ee ku dhaqan UK iyo Imaaraadka carabta, waxaanu tilmaamay inay farriimo wadaniyadeed soo fareen isaguna uu uga xog waramay xaaladda dalku marayo.
Guddoomiyuhu wuxuu sheegay inay urur ahaan aqbalayaan natiijo kasta oo ka soo baxda doorashada Goleyaasha deegaanka, waxaanu yidhi “Waxaan ku boorinayaa ummadda Somaliland inaynu dhammaan ka qeyb qaadano hanaankaas dimuqraadiyadda ah ee asxaabta badan ee aynu samaysanay inaynu ku tartan, waxaan idiin caddaynayaa in ururka wadani yahay urur nabadeed. Waxa kale oo aanu idiin cadaynaynaa inuu yahay urur ku dhaqmaya siyaasad nadiif ah oo xariir ah. Waxaanu idiin caddaynaynaa in natiijo kasta oo ka soo baxda doorashadaasi in ururka wadani aqbalayo. Walaalayaal waxaanu u baahan nahay taageeradiina shacbiga Somaliland dhammaanteenna waxaan rajaynayaa inaan dhammaanteen iskugu iman doono ururka Wadani.”
Dhinaca kale, Guddoomiyihii Urur siyaasadeedkii Iftiin Cabdiqaadir Cali Obsiiye oo ku biiray ururka Wadani, oo ka hadlay soo dhawayntii weftiga Guddoomiyaha ayaa sheegay inay la bahoobeen oo ay ku biireen urur siyaasadeedka Wadani oo uu tilmaamay inay u arkaan inuu yahay ka qudha ee ay isku afkaar dhow yihiin.
Somalilandpost.net
webmaster@somalilandpost.net