Hargeysa (SLpost)- Guddoomiyaha gobolka Togdheer Axmed Cumar X. Cabdilaahi (Xamarje), ayaa sheegay in maalintii Jimcahaa ee Dorraad uu madaxweyne Siilaanyo u gudbiyey waraaq is-casilaad ah oo uu kaga tagayo xilkii guddoomiyenimo ee gobolkaas ka hayey.
Axmed Cumar X. Cabdilaahi oo maanta shir-jaraa’id ku qabtay magaalada Hargeysa, waxa uu sababta is-casiladdiisa ku sheegay inay la xidhiidho duruufo shakhsiyeed oo isaga u gaar ah oo aanu wax tafaasiil ah ka bixin.
“Shalay (Dorraad) oo Jimce ahayd bishuna ay ahayd toban, waxaan codsi ixtiraam, qaddarin iyo xishood badani ku dheehan yahay aan u qortay Madaxweynaha Jamhuuriyadda Somaliland Mudane Axmed Maxamuud Siilaanyo, kaas oo aan kaga dalbaday in aan xaalad ii gaar ah awgeed aan shaqadii ka fadhiisto cid kalana uu meeshii u diro, laakiin safar buu ahaa, insha Allah, ALLE ha soo nabad celiyo, waxaan ku rejo waynahay, kolkuu yimaado ayaan jawaabta ka sugayaa,” ayuu yidhi Axmed Cumar X. Cabdilaahi.
Badhasaab Xamarje uu warbaahinta ugu baaqay inaanay qoraalkiisa istiqaaladda iyo sababaha keenay malo-awaalin, “ujeeddada ay warbaahintu ilaa shalay wadeen intaas bay ahayd, waxaanse ka dardaarayaa wixii malo-awaal ah ee aan jirin in aanay baahin, kolay qofka bani aadamka ah wixii akhbaara ee uu hadba helo inuu sheego ayuun baa muhiim ah, wax allaale wax kale oo cillad ahi jirto. Waxaan beeniyayaa wax allaale iyo wixii kale ee malo-awaal ah ee Warbaahinta la galinayo inay waxba kama jiraan tahay, intaa aan qortay ayuu aniga muraadkaygu yahay, is casilaadaydu intaas bay tahay, jawaabtana madaxweynahaan ka sugayaa,”ayuu yidhi Guddoomiyuhu, waxaanu intaas ku daray, “Anigu muddo badan baan soo shaqaynayay, muddo imika sadex sannadood ah waan shaqayaynay, intaa aan shaqaynayay kolay xaaladihii ii gaarka ah ee duruuftayda ah ayuun baan ugu baahday inaan is-casilo, sidaas baanay ku gebo gebowday.”
Guddoomiye Xamarje oo la weydiiyey in is-casiladdiisu ku xidhiidho saluug uu ka muujiyey faro-gelin dibadda kaga timi hoggaamintiisa maamulka gobolka, waxa uu u jawaabay, “Waxaynu ka hadlaynaa waa duruuftii anigu shaqadayda iskaga casilay, duruuftaa aan shaqadayda iskaga casilay waxaan idiin sheegay inaan madaxweynaha u qortay, duruufo ii gaara awgeed inaan iska casilay, waxii amar ah ee lay siinayaa waa hannaan dawladnimo,” ayuu yidhi, waxaanu intaas raaciyey, “Kolay waa qaabkii ay bani’aadamku aragtiyaha ugu kala gedisnaayeen, qofba wax bay la tahay, aniguse waxaan ahay nin qarankii u shaqaynaya, horana waan ugu soo shaqeeyay imika waan u shaqaynayaa, haddaan shaqada ka tago madaxweynaha waan ag taaganahay, mar walbana sheeg-sheeggeen hadhan bay ka dhigantahay taasi.”
Mar la weydiiyey in Madaxweynuhu ka aqbalay istiqaaladdiisa, waxa uu sheegay inaanu madaxweynaha wax jawaab ah ka helin isla markaana uu ka sugayo soo noqodkiisa, isaga oo intaas ku daray inaanu ku noqon doonin badhasaabka gobolka Togdheer haddii madaxweynuhu ka Aqbalo iyo haddii kaleba sababo caafimaad awgood.
SOMALILANDPOST.NET/Hargeysa