Saylac, (SLpost)- Guddoomiyaha Gobolka Selal Cabdirisaaq Waabari Rooble,ayaa ka war bixiyay dhismayaal sharci darro ah oo kooxo kootarabaan ay ka dhiseen meel u dhow xadka ay Jabuuti iyo Somaliland wadaagaan.
Guddoomiyaha gobolka Selal waxaa kale oo uu meesha ka saaray warar sheegayay in dhismayaasha ka bur buriyiyeen baabiintooda uu dalabkoodu ka yimi dhanka Jabuuti.
Waxaannu cadeeyay in babiinta dhismayaashaasi ay yihiin tallaabo sharci ah oo ay qaaday Xukuumadda Somaliland.
“Horta dhismayaal iyo deegaan la deganaa oo aanu baabiinay ma jirto, laakiin waxaanu duminay waabab ay dhisteen dad waxyaabo aan wanaagsanayn ka ganacsada oo si tuugo ah halkaa u marin jiray meeshuna Lawyacaddo ayay dhanka Koonfureed ka xigtaa 14 KM halka ay xadka aynu Jabuuti la wadaagnona u jirto ugu badnaan hal KM markaa waxay khatar ku tahay ammaan ahaan waxay khatar ku tahay in maandooriyeyaal la isaga gudbiyo labada dal waxay halis u tahay wax kasta oo aan sharci ahayn in ay marin u noqoto,”ayuu yidhi Badhasaabka Salel.
Badasaabka oo hadalkiisa sii watay waxa uu intaas ku kabay “Markaa sidaas ayaan u baabiinay waababkaa ka dib markii ay ka dhego adaygeen dadkii waababkaa sharci darrada ah samaystay.”
Mar aanu waydiinay in burburinta dhismayaashaasi uu ka dhashay dalab uga yimid dalka Jabuuti waxa uu kaga jawaabay “Horta dalku Jabuuti maaha ee waa Somaliland wax kasta oo Somaliland dhibaatou keenayana dawladda waajib ayaa ka saaran in ay ka hor tagto, markaa waababkaasi waxay ahaayeen meelo si qarsoodi ah loo soo mariyo kiniino khariban iyo waxyaabaha dumarku isku caddeeyaan. waxaa kale oo suuragal ah in daroogana laga soo gudbin karo. waxaa kale Somaliland ay xidhiidh wada shaqayneed oo wanaagsan ay la leedahay dalalka Dariska ee aynu xuduudka wadaagno sida Jabuuti iyo Itoobiya dhankoodana waa u diyaar in ay xidhiidhkeenna wada shaqayneed ilaaliyaan innagana (Somaliland) waajib ayaa innaga saaran in aan dhawrno markaa dal ahaan ayaanay innoo wanaagsanayn in dalkeenna lagaga cawdo in ay ka jirto meelo kootarabaan la mariyaa sidaas ayaanan u baabiinay waana dhulka caagan in la deegaameeyo horena ammarro iyo digniino ayaa uga soo baxay laakiin markii ay ka dhego adaygeen ayaan tallaabadan ka qaadnay.”
Waxaa kale oo aanu waydiinay in ay jiraan dad ay ku soo qabteen waababkaa ay baabiiyeen oo xidhani,waxaanu yidhi. “Haa illaa sadex qof ayaanu ku soo qabanay oo xidhan kuwaasoo meesha ka samaystay berkado ay biyaha ku shubtaan markii aanu amarnay inay baabiiyaanna diiday imikana way xidhan yihiin.”
Somalilandpost.net