Hargeysa (SLpost)- Guddoomiyaha Maxkamadda Sare ee Somaliland Aadam Xaaji Cali Axmed, ayaa Shaqaalaha kala duwan ee Hay’adaha Garsoorka uga digay inay ku dhex-milmaan dhaqdhaqaaqyada siyaasadeed ee doorashooyinka Somaliland iyo Xisbiyada Siyaasadda.
Wareegto uu Khamiistii maanta soo saaray Guddoomiyaha Maxkamadda Sare, ayuu ku sheegay in xeerar waajibinayaan inaan Shaqaalaha Garsoorku qayb ka noqon ololaha iyo dhaqdhaqaaqyada siyaasadeed ee doorashooyinka madaxtooyada, golayaasha deegaanka iyo wakiillada ee Somaliland oo dhan.
Wareegtada uu soo saaray Guddoomiyaha Maxkamadda Sare ee Somaliland Garyaqaan Aadan Xaaji Wareegtada, ayaa u dhignayd sidatan:-
“Wareegto uu maanta oo ay taariikhdu tahay 25/02/2021 soo saaray guddoomiyaha Maxkamadda Sare ahna guddoomiyaha guddida cadaaladda jamhuuriyadda Somaliland garyaqaan Aadam Xaaji Cali Axmed, ayaa uga digay shaqaalaha maxkamadda sare in ay ka qayb qaataan dhaq-dhaqaaqyada siyaasadeed ee doorashooyinka dalka.
Iyadoo ay ka reebayaan sharciga iyo xeerka nidaamka garsoorku tartanka dhaq-dhaqaaqa ololaha doorashada ee deegaanka, baarlamaanka iyo madaxtooyada.
16-kii bishan ayaa guddoomiyaha maxkamadda sare ee dalku wareegto ku socodsiisay, dhammaan guddoomiyayaasha maxkamadaha Racfaanada iyo ku-xigeenada xeer-ilaaliyaha guud ee gobolada dalka si loogu wargaliyo reebanaanta ka qayb-qaadashada dhaq-dhaqaaqyada siyaasadeed ee doorashooyinka.
Waxaana lala socodsiiyay in cidda garsoorka ka mid ah, ee danaynaysa in ay ka qayb noqoto goleyaasha deegaanka iyo wakiiladda ay shaqada dawladda iska casisho 90 maalmood ka hor muddada doorashada, halka xubinta u hoggaansami wayda amarkaasina laga qaadi doono talaabo sharciga waafaqsan.” Sidaa ayaa lagu yidhi wareegtada Guddoomiyaha Maxkamadda sare oo lagu baahiyey Bogga Facebook-ga ee Maxkamadda Sare.
Somalilandpost.net
contact@somalilandpost.net