Hargeysa (SLpost)- Guddoomiyaha Xisbiga talada dalka haya ee Kulmiye Muuse Biixi Cabdi, ayaa la sheegay inuu Madaxweyne Siilaanyo uga tanaasulay murashaxnimada madaxtinimada Xisbiga Kulmiye, ka dib markii caawa kulan laba geesood ahi ku dhexmaray Qasriga Madaxtooyada.
Kulanka dhexmaray Madaxweynaha Somaliland Md Axmed Maxamed Maxamuud (Siilaanyo) iyo guddoomiyaha Kulmiye Muuse Biixi Cabdi oo ka qabsoomay xarunta madaxtooyada caawa, ayaa la sheegay inay inay ka soo shaqeeyeen xubno Ganacsato waaweyn ah oo ka soo jeeda beesha Guddoomiye Muuse Biixi.
Ilo-wareedyo u dhuun-daloola kulan labada dhinac, ayaa Somalilandpost.net u xaqiijiyey in kulanka Madaxweynaha Iyo Guddoomiyaha qeyb ka ahayd Go’aamadii Golaha Guurtidu ka soo saareen khilaafkii KULMIYE.
Warku waxa uu intaas ku daray in Guddoomiyaha KULMIYE uu madaxweynaha ku war-geliyay inuu ka tanaasulay murashaxnimadii Madaxtinimadda ee uu hore u iclaamiyay inuu kula tartami doono xisbiga KULMIYE u matali doona doorashada sannadka dambe lagu wado inay dalka ka qabsoonto.
Guddoomiyaha KULMIYE ayaa la sheegay inuu kulankaasi kaga dhawaaqay inuu taageeradiisa la garab taagan yahay madaxweynaha oo uu ka shaqeyn doono sidii xisbigoodu doorashadda madaxtinimadda mar kale ugu guulaysan lahaa.
Madaxweynaha Somaliland Md Axmed Maxamed Maxamuud (Siilaanyo) ayaa la sheegay inuu badheedhaha Muuse Biixi ka dib uga mahad celiyay go’aankiisa isla markaana uu ku ammaanay guulihii xisbigu gaadhay muddadii afarta sanadood ahayd ee Muuse Biixi Hoggaaminayay xisbul-xaakimka KULMIYE.
Waxa la sheegay in Guddoomiyaha KULMIYE Sabtida berri uu balan-qaaday inuu warbaahinta u faahfaahin doono sababaha uu uga tanaasulay damaciisii la xidhiidhay inuu u tartamo murrashaxa madaxweynaha ee xisbigaas.
Kulankaas waxa la sheegay inay ku wehelinayeen Guddoomiyaha xubno Ganacsato ah oo ka soo jeeda beeshiisa oo uu horkacayay Maxamed Aw Siciid Geedi, kuwaasi oo la tilmaamay inay kaalinta ugu weyn ka qaateen sidii kulankaasi u qabsoomi lahaa, isla markaana meesha looga saari lahaa kala-qeybsanaantii ka dhalatay khilaafkii xisbiga KULMIYE.
Dhinaca kale, war-saxaafadeed ay caawa soo saareen ganacsatada arrintan gashay, ayaa lagu sheegay; “Khilaafkii KULMIYE Ee baryahanba soo jiitamayey, waxa si xilkasnimo ah u soo afjaray ganacsatada waaweyn ee beesha Sacad Muuse, waxayna soo saareen qodobbadan.
Guddoomiyaha Xisbiga KULMIYE, Md. Muuse Biixi Cabdi, wuxuu jagada Musharaxnimada shanta sano soo socota uga tanaasulay Madaxwaynaha Somaliland, Md. Axmed Maxamed Maxamuud (Siilaanyo) taasoo si niyad sami la isugu afgartay, kuna dhamaatay inay is gacan qaadaan Madaxwaynaha iyo Guddoomiyaha KULMIYE, Ka dib kulan dhex maray Caawa.
Magacyada Ganacsatada Beesha Sacad Muuse.
- Maxamed Aw Siciid Geeddi.
- Jaamac Oomar.
- Rashiid Ibraahim Ciise.
- Maxamed Xuseen Axmed.
SOMALILANDPOST.NET