Hargeysa (SLpost)- Guddiga Qandaraasyada Qaranka ee Somaliland, ayaa maanta shaaciyey Shirkado ku guulaystay fulinta Lix mashruuc oo Arbacadii todobaadkii hore ay tartan u galeen in ka badan 40 shirkadood oo xagga dhismaha ah, kuwaas oo dhammaantood ka hawl-gala gobollada iyo degmooyinka mashaariicda laga fulinayo.
Kulan Arbacadii ka qabsoomay Xarunta Guddiga Qandaraasyada Qaranka, ayaa Guddigu ku soo bandhigtay Lix Mashruuc oo dhammaantood la xidhiidha adeegyada aasaasiga ah ee Bulshada, ayaa kala ah waxa ka mid ah Xafiis Cusub iyo Qol Store ah oo lagu kordhinayo Dugsiga Qool-cadey ee gobolka Daad-madheedh, Dayac-tirka Dugsiyada Cabdisalaan, Bursade, Suuqsade iyo Abdaal ee gobolka Saaxil, Xarunta Waxbarashada ee Buuhoodle, Dhismaha Xarunta Waxbarashada ee Badhan, Dhismaha iyo Dayac-tirka Jeelka Gabiley, iyo Dhismaha Jeelka Minjo-Caseeye ee gobolka Saaxil. Mashaariicda Guddigu soo bandhigtay waxa ku tartamay 46 shirkadood oo dhammaantood ka qayb-galay kulanka lagu shaaciyey tartanka mashaariicda, kuwaas oo Guddigu la ballantay shaaciinta natiijada loogu muddeeyey Sabtida maanta.
Haddaba, kulan Sabtida maanta ku qabsoomay xarunta Guddiga Qandaraasyada Qaranka isla markaana ay goob ka ahaayeen Guddiga Qandaraasyada oo uu hoggaaminayo Guddoomiye Nuux Maxamed Xuseen iyo dhammaan shirkadihii tartanka ka qayb-galay, waxaana laga sheegay magacyada shirkadaha ku guulaystay Lixda Mashruucda oo laba ka mid ah loo fulinayo Ciidamada Asluubta, halka Afarta kalena yihiin bahda Waxbarashada.
Ugu horeyn, waxa kulanka ka hadlay Maxamuud Axmed Baarcad oo ah xubin ka tirsan Guddiga Qandaraasyada, waxaanu sheegay inay guddi ahaan kala xulista shirkadaha iyo kuwooda buuxiyey shuruudihii looga baahnaa ku mashquulsanaayeen Gelinkii dambe ee Arbacadii iyo labadii maalmood ee Khamiista iyo Jimcaha oo uu sheegay in xafiiskoodu shaqaynayey baaxadda culays ee hawshani leedahay awgeed.
Agaasimaha Guud ee Guddiga Qandaraasyada Qaranka Maxamed Axmed Xassan (Jabarti-Saadle) oo madasha ka hadlay ayaa sheegay inay maalinba maalinta ka dambaysa horumar ka samaynayaan nidaamka ay u maraan Qandaraasyada ay baahiyaan iyo kala xulista shirkadaha ku tarmaya.
“Kumanaan mashruuc oo lagu tartamay ayaanu halkan ku soo qabanay oo ku shaacinnay, maalinba ninbaa guulaysanaya, maalinna cidbaa guul-darraysata, laakiin waxa muhiim ah inaynu qaran ahaan guulaysanay. Waynu koraynaa, nidaamka qandaraasyada maalinba maalinta ka dambaysa si waafi ah oo aad u miisaan badan oo la fahmayo loo sii marinayaa,” Sidaas ayuu yidhi Agaasime Maxamed Axmed Xasan, waxaanu halkaas uga duceeyey shirkadaha guulaystay ee dusha ku qaatay culayska masuuliyadda loo igmaday.
Guddoomiyaha Guddiga Qandaraasyada Qaranka Mr Nuux Maxamed Xuseen oo munaasibadda ka hadlay, waxa uu shaaciyey magacyada shirkadaha ku guulaystay fulinta lixda mashruuc ee tartankooda hore loo furay.
“Waxaynu halkan ugu ballansanayn inay shaacinno lixdaas mashruuc shirkadihii ku guulaystay. Haddaan gudo galo oo kala sheego, waxa loo kala guulaystay Sidan:-
b) Dhismaha iyo Dayac-tirka Jeelka Gabiley, waxa Short-list (Isugu soo baxay) galay; Meecaad Construction Company, Modern Enterprise, Netco Construction Company. Waxa ku guulaystay Meecaad Construction.
t)- Dhismaha Jeelka Minja-caseeye, waxa Short-list (Isugu soo baxay) galay; Saxfo Construction Company, Sacdo Construction Company iyo Qaydar Construction. Waxa ku guulaystay Saxfo Construction Company.
j)- Dhismaha Xarunta Waxbarashada ee Buuhoodle, waxa Short-list (Isugu soo baxay) galay; Nasteexo Construction Co., Surad Construction Co. Waxa ku guulaystay Nasteexo Construction Company.
x)- Dhismaha Xarunta Waxbarashada Badhan, waxa Short-list (Isugu soo baxay) galay; Yucub Construction Co., Pillar Construction Co. Waxa ku guulaystay Yucub Construction Company.
kh)- Dhismaha iyo Dayac-tirka Afarta School ee Cabdisalaan, Bursade, Suuqsade iyo Abdaal, waxa Short-list (Isugu soo baxay) galay; Beach Construction Company, Masno Construction Co., Muuq-dheer Construction Co. Waxa ku guulaystay Beach Construction Company.
d)- Dhismaha School-ka Qool-cadey, waxa Short List-ga (Isugu soo baxay) galay; Qaydar Constrution iyo Laan Construction. Waxa ku guulaystay Qaydar Construction Company.” Sidaas ayuu sheegay Guddoomiyaha Guddiga Qandaraasyada Qaranka ee Somaliland.
Gebo-gebadii munaasibadda, waxa halkaas ka hadlay xubno ku hadlayey magaca shirkadaha ku guulaystay qandaraasyada iyo sidoo kale shirkadaha laga guulaystayba, kuwaas oo dhammaantood ka markhaati kacay sida ay ugu qanacsan yihiin garsoorka guddiga Qandaraasyada.
“Si Caddaalad ah ayaad hawsha u waddaan, waan hambalyeynayaa guddiga, waayo waxaanu ku qanacsanayn hawsha aad waddaan,” Sidaa waxa yidhi masuul ku hadlayey magacaa mid ka mid ah shirkadaha guulaystay.
“Runtii intii tartankaasi dhacayey waanu la soconey, marna kamaanaan hadhin, balse marna maanaan guulaysan, haddana waan hambalyeynayaa, waayo sida guddiga qandaraasyadu waxa u wadaan aad baanu ugu qanacsanahay,” Sidaasna waxa yidhi masuul ku hadlayey magaca mid ka mid ah shirkadaha u tartamayey fulinta mashaariicdan, balse lagaga fuulaystay.
Si kastaba ha ahaatee, Lixda Mashruuc ee guddigu maanta shaaciyey, ayaa qayb ka ah mashaariicaha ugu waaweyn ee ay bulshada u soo bandhigeen Guddiga Qandaraasyada Qaranku muddadii ay xilka hayeen, iyadoo xubnaha Guddigan oo la kowsaday xukuumadda madaxweyne Muuse Biixi, ay bulshadu ku tilmaanto inay wax weyn ka beddeleen nidaamka loogu tartamo qandaraasyada ay dowladdu baahiso oo dad badan ku ammaaneen hawl-qabadkooda, in kasta oo dadka qaarkoodna tuhunno ka muujiyaan hannaanka Guddigu u marto nidaamka halbeeg ee kala xulashada tartamayaasha ka qayb-qaata mashaariicda la shaaciyo.
Somalilandpost.net
contact@somalilandpost.net