Hargeysa (SLpost)- Guddoomiyaha Guddiga joogtada ah ee Golaha Wakiillada Somaliland Xildhibaan Ibraahin Mahdi Buubaa, ayaa Saxaafadda u sheegay in Golaha Wakiilladu Wasiirka hawlaha guud Cabdirisaaq Khaliif Axmed wax ka weydiin doono Sharciyadda Lacagta lagu qaado Berbera ee 80-ka Doollar ah, taasoo gaadhigii kasta ee soo degaya laga qaado.
Ganacsatada Baabuurta iibisa ee Macdarrada ku leh magaalooyinka kala duwan ee dalka, ayaa ka qayliyey Lacagta Siddeetanka Doollar ah, waxaanay Ganacsatu gaashaanka ku dhufteen bixinta Lacagtaas oo ay diideen, isla markaana ku tilmaameen mid sharci-darro ah oo cid gaar ah lagu naas-nuujinayo, iyagoo mar ay Wasiirka la kulmeenna sheegay inay isku fahmi waayeen waxa ay ka cabanayeen iyo sida uu wax u rabo isagu.
Arrintan oo dhawrkii toddodaad ee u dambeeyey cabashada Ganacsatada Gaadiidka Gawaadhidu ka muujinayeen taagnayd, waxa ka hadlay Guddoomiyaha Guddiga Joogtada ah ee Golaha Wakiillada Somaliland Xildhibaan Ibraahin Mahdi Buubaa oo maanta Saxaafadda qaarkeed kula hadlayey magaalada Hargeysa, waxaanu yidhi; “Waxaannu leenahay Wasiirka Hawlaha guud Cabdirisaaq Khaliif, hadda dibedda ayuu ku maqan yahaye, marka uu soo noqdo Goleweynaha Wakiillada ayaannu ugu hor-yeedhi doonnaa. Waxa la su’aali doonaa arrintan halka uu ka keenay maaddaama oo aanay ahayn wax sharci ah oo Golaha Wakiillada soo maray.”
Xildhibaan Buubaa waxa uu sharci-darro ku tilmaamay lacagta lagu sheegay ilaalinta tayada Gaadiidka ee Baabuurta ka soo degaya Dekedda Berbera laga qaadayo oo caddadkeedu yahay $80 (siddeetan) Doollarka Maraykanka ah. “Waxaannu leenahay Wasiir adba waad ka war-haysaa inaanay arrintaasi sharci ahayn, Sharciyad ay ku fadhidaana aanay jirin. Waxaan sharci jidayn inaad jidayso oo ummadda la hor tagtana adigay nusqaan kugu tahay.” Sidaa ayuu yidhi Guddoomiyaha Guddiga joogtada ah ee Golaha Wakiillada Xildhibaan Ibraahin Mahdi Buubaa oo sidoo kale ah Afhayeenka Xisbiga Mucaaradka ah ee WADDANI.
Waxaanu Xildhibaan Buubaa oo sii watay hadalkiisa intaas ku ladhay; “Ganacsatada waxaannu leenahay Cashuurtii Sharciga ahayd ee aanu idinku laban-laabnay uun baad bixin kartaan, waxaan Sharci ahayn, cidda idin weydiisaana way gar-daran tahay, ninka bixiyaana waa nin Qaranka duminaya oo xaaraan bixinaya oo laaluush bixinaya. Sidaas darteed, waxaannu idin faraynaa inaydaan Lacagtiinna dhayal ku bixin, haddii maanta taas bixisaanna berrina tu ka daran, ayaa la idin weydiin.”
Xildhibaanku waxa uu u mahad-naqay guddida Macdaarleyaasha Baabuurta soo dejiya ee diiday bixinta lacagtaas sharci-darrada ah, waxaanu yidhi; “Aad baan ugu mahad-naqayaa Guddiga Macdaarleyaasha ee arrintan diiday ee Xukuumadda yidhi na tusa Sharciga aad nagaga qaadaysaan, ee Xukuumaddu isku meeraysatay ee wax sharci ah oo ay tusto garan wayday. Waxaan leeyahay waad ilaaliseen Qaranka. Inta la soo baxday oo illaa hadda 100 gaadhi lagu sheegayna waxaannu leenahay arrin khalad ah baad samayseen.”
Wasiirka Hawlaha guud, Gaadiidka iyo Guryeynta Somaliland Cabdirisaaq Khaliif Axmed, ayaa bishii February ee sannadkan 2015-ka Xaflad u qabtay furitaanka Shirkad uu ugu yeedhay inay ka wada-shaqaynayaan qiimaynta tayada Gaadiidka Somaliland, isagoo bishii March ee aynu ka soo gudubnay Dekedda Berbera geeyey Koox Shirkaddaas ka tirsan oo uu sheegay inay hubinayaan tayada Baabuurta ka soo degaya Dekedda Berbera, isla markaana Gaadhi aanay tijaabini soo geli karin dalka, iyadoo kooxdaasi Gaadhi kasta oo ay tijaabiyaan ka qaadaya Lacag Siddeetan Doollar ah, taasoo ay Ganacsatada Gaadiidka soo dejiya intooda badanina ku gacan-saydheen, marar badanna cabashooyin ka muujiyeen. Ilaa Immika ka mijo wax ay Xukuumaddu ku beddeshay cabashooyinka Ganacsatada Gawaadhida soo dejiyaa muujiyeen.