Hargeysa (SLpost)- Komiishanka Qaranka Somaliland ayaa ku dhawaqay Maalinta iyo Waqtiga ay bilaabmayaan olalaha doorashooyinka Golayaasha Deeganka iyo Sida ay u kala horeeyaan Ururada Iyo Xisbiyada ka qayb qaadanaya doorashada dalka ka qabsoomi doonta 28 bisha Novenbar 2012.
Afhayeenka Komishinka Mudane Maxamed Axmed Geele oo shir jaraid ku qabtay xarunta komiishanka ee Caasimada Hargaysa ayaa ku dhawaqay jadwalka ururada iyo xisbiyada ay ku soo bandhiga- yaan baraamijyadooda iyo siday u kala leeyahiin maalmaha ololaha doorashada ee gobolada dalka oo dhan .
Afhayeenka ayaa sheegay in xisbiyada iyo ururradu ay u kala horenayaan sidii loogu qori tuuray ,isla markaana ay Ololaha ku gelayaan qaabkan.
- 29/10/2012 Ururka Ummada
- 30/10/2012 Xisbiga UCID
- 31/10/2012 Xisbiga Kulmiye
- 1/11/2012 Ururka Dalsan
- 2/11/2012 Ururka Rays
- 3/11/2012 Ururka Waddani
- 4/11/2012 Ururka Xaqsoor
Afhayeenka komishanka doorashooyinka qaranku waxa kale oo uu u soo jeediyey ururada iyo xisbiyada ka qayb qaadanaya doorashadan inay ilaaliyaan amniga qaranka inta lagu guda jiro ololaha doorashada golaha deegaanka,waxaa kale oo uu intaas ku daray inay sameeyeen gudida daba galka iyo anshaxa oo jaan goynaysa in Ururada iyo Xisbiyadu ay ku dhaqmayaan nidaamka anshaxa doorashada ee ay saxeexeen iyo inay si siman barnaamijyadooda uga gudbiyaan Warbaahinta Dawlada.
Afhayeenka Komiishanka Doorashooyinka Qaranka Mudane Maxamed Axmed Xirsi Geele waxa uu ka dalbaday Mas’uuliyiinta Xukuumadu in hantida guud ee la wada leeyahay aanay si gaar ah uga faa’iidaysan isagoo xusay in Madaxweynaha Jamhuuriyada Somaliland uu Wareeegto ka soo saaray amuurtaas.
Ururada Siyaasadda iyo Xisbiyada ka qayb qaadanaya doorashada golayaasha deegaanka ayaa mid kastaaba waxa la siiyay afar maalmood inuu bulshada ugu gudbiyo barnaamijkiisa siyaasadeed.
SOMALILANDPOST.NET
webmaster@somalilandpost.net