Hargeysa (SLpost)- Guddida doorashooyinka Somaliland ayaa iska fogeeyey eedaymo ururrada iyo Xisbiyada tartankii Dawladda Hoose ka qayb-galay ugu jeediyeen khaladaadkii doorashadaas oo ay u sibir-saareen duruufo sharci oo la soo gudboonaaday.
Guddida doorashooyinka oo maanta xaruntooda u qabtay munaasibad ay shahaado sharaf ku guddoon siiyeen shirkaddii soo daabacday waraaqihii codbixinta doorashadii Golaha deegaanka ee dalka ka qabsoontay 28-kii bishii November sannadkii hore, waxa ay qireen inay doorashada ku qabteen xaalad adag oo ay ku xeernaayeen Duruufo badan oo dhanka sharciga ah iyo waliba arrimo la xidhiidha nidaamka doorashada qabsoomideeda loo qorsheeyay.
Guddoomiyaha Komishanka doorashooyinka Eng Ciise Yuusuf Xamari oo ka hadlay Munaasibad Komishanku u qabtay shirkaddii la siiyay qandaraaska Waraaqaha doorashada lagu galay oo lagu magacaabo SMITH, waxa uu sheegay inay doorashadaasi ahayd mid isxambaar ah, “Doorashadii deegaanku waxay ahayd isxambaar, musharixiintu xambaarayeen xisbiyada/ururadu si loo helo saddex xisbi qaran, Intaa oo dhan oo qof iyo qabiilba u guclaynaya, dhammaana diyaar u ahaa sax iyo qaladba inay helaan cod ay ku soo baxaan,” ayuu yidhi guddoomiye Eng Ciise Xamari.
Guddoomiyaha Komishanku waxa kale oo uu soo qaaday, “Komishanka doorashooyinka Qaranku waxay ugu badheedheen inay ku qabtaan doorashada baaxadaasi leh iyadoo ay jireen duruufo ku gedanaa doorashada,” ayuu yidhi waxaanu intaa ku daraya isaga oo faahfaahinaya duruufaha uu sheegay inay ku xeernaayeen, “Dabarro sharci oo iska leh oo u kala baxaya Diiwaangalintii oo la laalay, Habkii liistada furan oo la qaatay oo ah tajriibo inagu cusub, galdalooladeedana leh, iyada oo aanay jirin degmo doorashooyin sii kala xaddida Magaalooyinka Waaweyn, Iyadoo aanu jirin sharci xakameeya dadka ku noqnoqda doorashada ama codeynta. Intaasi oo jirta Komiishanka doorashooyinka qaranka Illaahay wuu ku guuleeyay qabsoomidii doorashadii 2012-ka.
Komiishanku waxay sheegeen in aanay u dulqaadanayn inuu eedeeyo qof qaatay natiijada lagu muransan yahay, “Komishanku waxaanu marnaba qaadanaynin inuu eedeeyo ninkii natiijada qaatay, taasoo ay maanta ku fadhiyaan dalka oo dhan xildhibaanadii cusbaa,” ayuu yidhi Gudoomiyaha Komishanku.
Ururradii tartanka doorashada dawladaha Hoose ka qayb-galay, ayaa qabsoomiddii doorashada ka dib waxa ay soo bandhigeen waraaqo lagu codeeyey iyo qaar aan lagu codeyn, kuwaas oo ay sheegeen in laga helay goobihii doorashada iyo Dooxa magaalada Hargeysa, waxaanay eedaymahaasi qayb ka ahaayeen dhaliilihii ay xukuumadda ugu jeediyeen inay doorashada ku shubatay. Sidoo kale, waxa ay ku doodeen ururradaasi in tayada waraaqahaasi oo liidatay awgeed ay sababtay in si fudub loo daabacdo.
SOMALILANDPOST.NET