Hargeysa (SLpost)- Shirka Todobaadlaha ah ee Golaha Wasiirrada Somaliland, ayaa maanta lagaga dooday Diyaar-garowga Doorashooyinka Goleyaasha Wakiillada iyo Deegaanka oo loo muddeyey inay dalka ka qabsoomaan horaanta sannadkan.
Shirka oo ay goob-joog ka ahaayeen madaxweynaha iyo madaxweyne ku-xigeenka Somaliland, waxa sidoo kale warbixinno lagaga dhegaystay xubno ka mid ah Golaha Wasiirrada oo ay ugu horeyso Wasaaradda Arrimaha Gudaha Somaliland.
War-saxaafadeed ka soo baxay xafiiska afhayeenka madxweynaha oo nuqul ka mid ahi soo gaadhay warbaahinta Somalilandpost.net, ayaa u qornaa sidan:-
“Fadhigii 69aad ee golaha wasiirrada Jamhuuriyadda Somaliland oo uu shir guddoominayey Madaxweynaha Jamhuuriyadda Somaliland, Mudane Muuse Biixi Cabdi, kuna wehelinaayey Madaxweyne ku xigeenka Jamhuuriyadda Somaliland, Mudane Cabdiraxmaan Cabdilaahi Ismaaciil (Saylici), oo warbiximo lagaga dhegeystay qaar ka mida wasaaraddaha, lagagana dooday arrimaha diyaar garawga doorashooyinka.
Ugu horrayn wasiir ku xigeenka arrimaha gudaha, ayaa golaha warbixin ka siiyey xaaladda guud ee nabadgelyada dalka, sidoo kale, wasiirka wasaaradda waxbarashada iyo sayniska ayaa golaha warbixin ka siiyey xaaladda waxbarashada dalka, isagoo xusay in wasaaraddu ku hawlan tahay kor u qaadida waxbarashada dalka iyadoo fulinaysa siyaasada xukuumadda ee ah in waxbarashada tayadeeda iyo gaadhsiinta goob walba la hirgeliyo.
Wuxuu goluhu dood ka yeeshay diyaar garowga doorashooyinka dalka ku soo fool leh, madaama ay xukuumadda ka go’an tahay qabsoomida doorashooyinku, waxaana goluhu go’aamiyey innaan la ogolayn in shaqaalaha dawladda iyo ciidamadu iyagoo ku gudda jira shaqadii qaranka inay muujiyaan astaamaha iyo dhaq-dhaqaaqa ololaha musharaxnimo ee hankooda tartanka doorashooyinka, balse cidii danaynaysa inay ka qayb-galaan doorashooyinka waa inay banneeyaan shaqooyinka ay qaranka ka hayaan.
Ugu danbayn wuxuu madaxweynuhu golaha ku adkeeyey inay dardar-geliyaan mashaariicda horumarineed ee dalka ka socda sannadka cusub.” Sidaas ayaa lagu sheegay war-saxaafadeedka.
Somalilandpost.net
contact@somalilandpost.net