Saylac (SLpost)- Xildhibaannada Golaha Deegaanka Degmada Saylac, ayaa maanta isugu yimi kulankoodii u horreeyey tan iyo intii la doortay Golahaas oo muran dhinac hoggaanka ka dhaliyey degmadaas.
Fadhiga maanta oo ay ka soo xaadireen 17-ka xildhibaan ee golaha Deegaanka Saylac oo ay goobjoog ka ahaayeen Wasiirka Wasaaradda Arrimaha Gudaha Md Maxamed Nuur Carraale (Duur), Wasiirka Waxbarashada iyo Tacliinta Sare Marwo Zamzam Cabdi Aadan, La-taliyaha madaxweynaha ee Doorashooyinka Maxamed Muuse Abees iyo maamulka gobolka Salal, ayaa ku yimi ka dib markii Weftiga xukuumadda ee degmadaas ku sugani kulamo gooni-gooni ah la qaateen beelaha ku muransan hoggaanka Golaha Deegaanka Saylac, taas oo suurto-galisay in meel layla dhigo xalinta tabashooyinka la xidhiidha Doorashadii goleyaasha deegaanka ee dalka ka qabsoontay sannadkii hore daba-yaaqadiisii.
Wasiirka Arrimaha Gudaha Md Duur oo kulankaas furay, ayaa sheegay inuu ku faraxsan yahay inay goob iskugu yimaadaan Xildhibaannada Golaha deegaanka degmada Saylac, waxaanu ku booriyay inay is calool xaadhaan oo ay ka wada hadlaan aayahooda. Isla markaana ka heshiiyaan wixii khilaafaad ah ee dhexdooda yaala.
Wasiirka Daakhiliga Md. Maxamed Nuur Caraalle waxa uu Mudaneyaasha Golaha deegaanka u soo jeediyay inay keeni karaan xal waara oo lagu soo af-jaro kala qeybsanaanta iyo khilaafka dhexdooda ka jira.
Wasiirka waxbarashadda iyo tacliinta sare Marwo Zamzam Cabdi Aadan oo kulankaasi ka hadashay ayaa iyana sheegtay inay ugu ducaynayso Golaha Deegaanka Saylac midnimo iyo khilaaf la’aan, waxaanay u soo jeedisayinay meel iska dhigaan wixii cunfi ah una midoobaan sidii ay uga jibo keeni lahaayeen horumarka degmaddaasi u baahan tahay.
Waxa isaguna kulankaasi ka hadlay Badhasaabka gobolka Salel Nuur Cismaan Guulleed, waxaanu Xildhibaanadda u soo jeediyay inay ku dedaalaan sidii ay u xeerin lahaayeen danta guud isla markaana u soo afjari lahaayeen khilaafkooda.
Golaha Deegaanka ee Saylac ayaa khilaafkiisu ka dhashay ka dib markii Toban Xildhibaan oo ka mid ah 17-ka Xildhibaan oo ka soo jeeda Beesha Samaroon ay doorteen maayar iyo Maayar Ku xigeenka cusub ee degmadda Saylac, halka 7 xildhibaan oo Beesha Ciise Golahaas ugu jira aanay goob joog ka ahayn kana soo xaadirin fadhigaasi wax lagu dooranayay oo ay qaadaceen.
Sidoo kale, horaantii Bishan, waxa degmadda Saylac ka dhacay mudaharaad rabshado watay oo sababay dhimasho iyo dhaawac, kaasi oo salka ku hayay khilaafaadka ka dhashay ka dib markii la shaaciyey in Maayarka cusub ee degmadaasi xilka kala wareegayo maayarkii ka horeeyey ee wakhtigiisu dhammaaday, taasina ay dhalisay inay isku dhacaan ciidamada ammaanka iyo shacab ka gadoodsan natiijadoo ka soo baxday doorashadii goleyaasha deegaanka ee dhammaadka sannadkii hore Dalka ka Qabsoontay.
SOMALILANDPOST.NET