Hargeysa (SL.Post) Isbedelada iyo gad-gadoonka waayaha siyaasadeed ee Somaliland ayaa u muuqda inuu hadba ku soo noqonayo halkii uu hore uga hayaamay ee ay shacabku filayeen inaan dib loogu soo noqon doonin.
Mawduuca muddo kordhinta ayaa ahaa kii ugu xaasaasinaa ee xilligii uu talada dalka hayay Daahir Rayaale, dhawr goor sababay mudaharaado khasaare keenay, ka dib markii ay mucaaradkii wakhtigaas oo uu Madaxweyne Siilaanyo horkacayay diideen muddo kordhin.
Madaxweyne Siilaanyo, wuxuu sannadihii 2008, 2009 ahaa nin aad uga soo horjeeda waxa loogu yeedho “Muddo kordhin.”, waxaanu golaha guurtida ku canaanan jiray inay muddo kordhin aan sharciyad lagu salayn u sameeyaan Madaxweyne Rayaale iyo xukuumadiisa, isagoo soo bandhigi jiray khasaaraha ay muddo kordhintu ku hayso Somaliland.
Sidoo kale wuxuu geesta kale Axmed siilaanyo baaqyo u diri jiray beesha caalamka oo uu ka dalban jiray inay culaysyo soo saaraan Madaxweyne Daahir Rayaale Kaahin, si uu ugu soo noqdo jidkii dimuqraadiyadda.
September 24, 2009, wuxuu Axmed Siilaanyo oo uu weheliyay guddoomiyaha UCID Faysal Cali Waraabe, goor habeenimo ah soo wada saareen baaq qaylo dhaan ah oo la xidhiidha muddo kordhin ay guurtidu wakhtigaas u qorshaynayeen in loo sameeyo Madaxweyne Daahir Rayaale Kaahin.
Axmed iyo Faysal, waxa ay shacabka ugu baaqeen inay isugu soo baxaan mudaharaad salmi ah oo isugu yimaadaan xarunta golaha guurtida hortiisa, iyagoo geesta kalena baaqyo u diray beesha caalamka.
Bayaankaas Axmed iyo Faysal ay soo saareen waxay iyagoo beesha caalamka la hadlaya ku yidhaahdeen sidan “Sidoo kale, waxaanu ku wargelinaynaa beesha caalamka ee daneeya Somaliland iyo wadamada aynu saaxiibka nahay ee deriska ah, muddadana ku hawlanaa xal-u-helida khilaafyada siyaasadeed iyo kuwa sharciyeed ee dalka ka jira in xukuumadda Riyaale ay hortaagan tahay dedaalkii iyo gunaanadkii iyo soo ururintii qodobada saldhiga u noqonaya heshiis waara oo dhex mara saddexda Xisbi Qaran, una horseeda qabsoomidda doorasho xor oo xalaal ah.”
Axmed Siilaanyo oo shirka jaraa’id ee bayaankaas laga akhriyay ka hadlayaa wuxuu yidhi
“Madaxweynuhu wuxuu maanta qasbay Golaha Guurtida qayb ka mid ah oo uu doonayay inay u kordhiyaan..Waxaanu doonaynaa inay umaddu isu-soo-baxdo oo ay diido, sidii ay horeba u diidi jirtay oo ay Golaha Guurtida isugu hor yimaadaan.” Sidaa waxa yidhi Guddoomiyaha KULMIYE Axmed-Siilaanyo.”
Haddaba, maanta waxa taladii Somaliland haya Axmed Maxamed Siilaanyo, waxaanu golaha guurtida saaka horgaynayaa muddo kordhin uu ka dalbanayo in loo sameeyo golaha wakiilada si loo kala qaado labada doorasho ee madaxtooyada iyo baarlamaanka.
Geesta kale, waxa iyaguna shalay bayaan soo saaray dalalkii beesha caalamka ee uu ka dalban jiray inay Daahir Rayaale culays saaraan. Waxay dalalkan oo Somaliland taageeraa Madaxweynaha ka codsanayaan inuu joojiyo muddo kordhinta oo uu wakhtigooda ku qabto doorashada baarlamaanka.
Shacabka Somaliland waxa la gudboon inay doortaan hoggaamiye mudakar ah oo ay imtixaan adag ka qaadeen iskana dhaafaan inay siyaasiyiinta ku doortaan hadalada ay codka ku raadinayaan iyo haybta guud ee ay la wadaagaan.
Somaliland waxa ay u baahantahay siyaasi hore u socod leh oo hal baarkeed ka halacsada siyaasadda Geeska Afrika islamarkaana aan ku tallo qaadan dareenada ee ku tallo qaata hoggaamin iyo tallo urursi.
Somalilandpost.net
Source Wargeyska Geeska Afrika