Gabaygan loogu magac Daray [Ilmadii Yaxaaska] waxa tiriyey Hal-abuurka Da’da yare e Axmed Cabdilaahi Maxamuud (Fartaag). Abwaanku waxa uu gabaygiisa ku muujinayaa Guul-darradii laga dhaxlay in la helo Shanta Soomaaliyeed oo midowda, Hamigii Shacabka Somaliland ee Wakhtigaas iyo Go’aanka ay ka qaateen dhibaatadii ka soo gaadhay midowgii lagu hungoobay ee Somalia.
Abwaan Fartaag waxa kale oo uu Gabaygiisa ku iftiimiyey Siyaasada Dawladda Ingiriiska ee wakhtigan ay kula shaqaynayso Soomaaliya iyo Doorka uu ka ciyaarayo isbeddelka dibloomasiyadeed ee siyaasaddiisa Arrimaha Debedda.
Waxa uu Abwaanku Gabaygiisa ku bilaabay:
Israacii horeetiyo kol bay eeday midawgiiye
Shantii loo abtirinaayay way kala irdhoobeene
Amxaarada darbaa raacay oo adiis tagaye
Enf,dhii ma soo noqon ilaa aagii nayroobi
Jabuutina iskeed bay jirtaa awr u rarataaye
S/land aqoonsay rabtaa iyo aradkii dawlaade
*** *** ***
Ku asqoobe soomaalidii aagagaa xidhane
Isticmaarkii kala qaybiyiyo gaalo eersada,e
Inay urursanaatiyo la diid qaar is aaminaye
Afrikaanka waa loo tashaday aadmi kala roone
*** *** ***
Unuga iyo seeskiyo dalkaan nabad ku aas-aasay
Ambaqaadka Qarannimo dalkaan cadaw ka oodaayay
Ubaxa iyo beeraa dalkaan samo ku iidaamay
Ayaantii qadhaadhayd dalkii kumanka loo aasaayay
Isticmaaradii yimid dalkaan ololka jiidhsiiyay
Afwayniyo danaystaha dalkaan orod ku dhaafsiiyay
Ubadka iyo hooyada markii ayda lagu daadshay
Abaarii na soo maray waxaan omas ka soo doognay
*** *** ***
Isma dhiibin shacabkani intuu aadmi soo jiraye
Adkaysuu yaqaanaa markay talo irdhawdaaye
Islaam weeye diintiyo waxyiga aaminoo qiraye
Asxaabtii rasuulkiyo csw,waa ehelkii khayraade
Rabi baa ilaashada Dalkoo iilanwaa kaniye
Agoomada u soo hadhay baa aabo,yaal noqone
*** *** ***
Ingiriis wuxuu wado beryahan uunki wada yaabye
Argagixiso maahee jugtani waa amuur culuse
Uurka wuxuu ku haystaana waa asraar kale,e
Ujeeduu ka leeyahay warkuu yidhi iblayskiiye
Oohin yaan la moodine hayay waa ilmo yaxaase
*** *** ***
Isku laabta buu leeyahoo raranka oogaaye
Axankuu sugaayaa markay laba is eedaaye
Is cun buu ku leeyahay aan kuu sii cuno,e
Arligii nabdoonaa haduu eed ka soo sheegay
Bal ogaada somaliyeey aarki soo noqoye
Ogaalka iyo waayeel maxaa odayadii seexshay
Aqoonyahankii joogiyo mee indheer garadkii
‘Maah Maah Soomaaliyeed baa ahayd:
[Waxa maanta jooga ninkaan garani waxa soo socda ma garto]’
Erayadii Abwaan Axmed C/laahi Maxamud
[Axmed Fartaag]