Ceerigaabo (SLpost)- Wefti ka kooban Afar Wasiir oo Xukuumadda Somaliland ka tirsan, ayaa ugu sugan magaalada Ceerigaabo Xalinta is-maan dhaaf iyo shaqaaqo ka dhex aloosan bulshada magaalada Ceerigaabo, taas oo ku timi saluug ay bulshada qaarkeed ka muujiyeen qaabkii loo maamulay lacagtii Giimbaarta ahayd ee Xukuumaddu ka beddeshay magaaladaas.
Weftigan oo uu hoggaaminayo Wasiirka Wasaaradda Xannaanada Xoolaha Dr Cabdi Aw-Daahir Cali oo ay xubno ka yihiin Wasiirka Gaashaan-dhigga Md Axmed Cali Cadami, Wasiirka Dhalinyarada iyo Ciyaaraha Md Cali Siciid Raysal iyo Wasiirka kheyraadka Biyaha Md Xuseen Axmed Cabdulle, ayaa shalay socdaal ku gaadhay magaalada Ceerigaabo ee xarunta gobolka Sanaag.
Wasiirka Xanaanada xoolaha Dr. Cabdi Aw Daahir Cali oo ka hadlay ujeeddada socdaalkooda, ayaa ugu horreyn bulshada iyo maamulka gobolka/magaalada uga mahadceliyay soo-dhaweyntooda, waxaanu ka waramay ujeedada socdaalkoodu la xidhiidho, kaas oo ku taxaluqa saddex ujeeddo oo kala duwan.
“Waxaaanu nahay wefti Afar xubnood oo ka mid ah Golaha Wasiiradda oo uu soo diray Madaxweynaha Jamhuuriyadda Somaliland Md. Axmed Maxamed Maxamuud (Siilaanyo) intaanu qaban safarka Turkiga, markaa waxa uu halkan noogu soo diray inaanu joogno maalmo, si aanu xoog warran uga helno Gobolka, anaguna aanu ugu warrano, iyaguna aynoo warramaan hadday tahay waxgarad iyo hadday tahay shacabkaba,” ayuu yidhi Wasiir Cabdi Aw-Daahir.
Wasiirka oo hadalkiisa sii watay, waxa uu yidhi, “Ta labaad ee aanu halkan u nimi waxay ahayd madaama Madaxweynaha hadafkiis kowaad ay tahay in waddadaas Ceerigaabo iyo Goballada isku xidha in la dhiso oo la iskugu tago, waxaanu arrinkaasi ka yimaaddaa iyadoo ga’aankaas Dawladu qaadatay in shacabka Reer Somaliland gude iyo debad-ba meelkasta oo ay joogaan in la iskugu tago sidii loo dhisi lahaa waddadaas, taasina waxay ku imanaysaa inaga oo tacabka iyo talada ka wadda midowna. Markaa taasi waxay sabab u noqotay in anaguna aanu ka qayb qaadano wacyi-galinta Bulshada.”
Wasiirku waxa kale oo uu soo hadal-qaaday ujeeddo kale oo socdaalkooda gobolka Sanaag la xidhiidho, “Waxa kale oo aanu halkan u nimi shaqaaqooyinkii dhacay, markaa waxa loo baahan yahay in wax yaabahaas dhacay la dhigo oo lagu midoobo shaqada. Meelkasta way ka dhacdaa is Af-garan waagu, lakiin waxa lagu xalin karaa inaynu ka eegno danta guud ee wayn. Waddadaasna Ceerigaabo oo kaliya sugimayso ee Ummadda oo dhan ayaa sugaysa, waxaana la ansixiyey Xeer dhaqaale loogu aruurinaayo oo ku adag Xukuumada Somaliland,” ayuu yidhi.
SOMALILANDPOST.NET
contact@somalilandpost.net