Midowga Yurub, ayaa Hay’adda UNICEF ku taageerey Laba Milyan iyo Badh Lacagta Yurub ah (€2.5 milyan) oo loogu talo-galay inay ku fuliso gargaar bani’aadamnimo si ay ugu bixiso waxqabadyadyo Nafaha lagu badbaadiyo oo dhinaca nafaqeynta, biyaha, fayadhowrka iyo nadaafadda ah oo la gaadhsiiyo Carruurta Soomaaliyeed.
Waxaa sidaa lagu faahfaahiyey War-Saxaafadeed qoraal ah oo xalay ka soo baxay Xafiiska Hay’adda Carruurta u qaabbilsan Qaramada Midoobay ee UNICEF ku leedahay magaalada Nairobi ee Caasimadda Kenya, kaasoo nuqul ka mid ahi soo gaadhay Wargeyska Himilo waxa uu u dhignaa sidan:-
“Nafaqo-xumo ayaa weli halis ku haysa nolosha kumannaan carruur ah oo ku nool guud ahaan, Soomaaliya waxaana xaaladda uga sii darey adkaanshaha sida gargaarka bani’aadamnimada loo gaarsiinayo gobollada koonfurta iyo bartamaha dalka.
Sida ay tilmaamayaan daraasadihii ugu dambeeyey ee nafaqada, waqti kasta waxaa jira 38,000 oo carruur nafaqo-xumo ba’ni ay hayso ah oo u baahan gargaar baxnaanin oo naftooda lagu badbaadiyo, iyada oo la rajaynayo in 150,000 xaaladood la arko sanadkan gudihiisa. Magaalada Buulo Burte ee bartamaha gobolka Hiiraan, shantii carruur ahba mid ayaa ay haysaa nafaqo-xumo aad u ba’an. Ilmaha ay hayso nafaqo-xumada ba’an, ayaa sagaal jeer dhimasho uga dhow ilmaha caafimaadka qaba.
Lacagtan ayaa la soo marinayaa Guddiga Gargaarka bani’aadamnimada iyo Waaxda Ilaalinta Madaniga ee Midowga Yurub (the European Commission’s Humanitarian Aid and Civil Protection department (ECHO). Carruurta Soomaaliya, ayaa ay dhibaatada ugu weyn ka soo gaadheysaa xaaladda deg-degga ah ee adag. Waxaa nalooga baahan yahay in carruurta ay naftoodu halista ku jirto aan waqtigii loo baahnaa la gaarno daaweyn, in aan hubinno in aaney ku dhicin cudurrada loo dhinto ee ay sababaan biyaha aan nadiifta ahayn iyo in qoysaska ugu nugul ay awoodaan in ay daboolaan baahida aasaasiga ah ee carruurtooda.” Sidaa ayuu yidhi Lars Oberhaus oo ah Madaxa Xafiiska ECHO ee Soomaaliya.
Maaliyadda uu bixinayo Midowga Yurub waxaa ay UNICEF ka caawin doontaa in ay gaadho Carruurta la silcaysa nafaqo-xumada ba’an iyada oo siineysa cuntada daaweynta ee u diyaarsan in hore laga cuno, taas oo ah mid ka sameysan Laws lagu darey Faytamiinno iyo Macaadin. Gargaarka waxaa la soo marin doonaa Xarumaha Barnaamijka Daaweynta Bukan-socodka, halkaasoo ay ku heli doonaan baadhitaanno caafimaad iyo tallaallo. Carruurta nafaqo-xumada ba’ani ay hayso oo ay u weheliyaan dhibaatooyin caafimaad, sida fuuq-bax ba’an iyo matag, ayaa la seexinayaa xarumaha baxnaaninta, halkaasoo ay ku heli doonaan daaweyn bukaan-jiif oo takhasusi ah iyo daryeel daaweyn oo lagu siinayo caano wax lagu daaweeyo. Waqtigaan la joogo, UNICEF waxaa ay taageereysaa illaa 239 xarumaha OTP ah iyo toban iyo afar xarumaha Baxnaaninta ah oo ku yaalla guud ahaan Soomaaliya.”
Steven Lauwerier, oo ah Wakiilka UNICEF ee Soomaaliya, ayaa yidhi; “Maaliyaddan aan helney ayaa ah mid aad muhiim u ah oo innaga caawinaysa badbaadinta nafaha. In kasta oo dhinacyo badan ay wax ka hagaageen, haddana halista ah in carruurtu ay u dhintaan nafaqo-xumo ayaa weli ah mid aad u sarreysa qaybo badan oo Soomaaliya ka mid ah. Maaliyaddani ma aha oo keliya mid naga caawinaysa wax ka qabashada baahiyaha ugu deg-degsan, laakiin waxaa ay sidoo kale gacan ka geysanysaa hawsha UNICEF iyo tan la-hawlgalayasheeda ee aan ku dhiseyno adkeysiga qoysaska iyo bulshooyinka ugu nugul.” Waxay Hay’adda iyo Ururrada caalamiga ah iyo kuwa waddaniga ah ee la shaqeeyaa gargaarkan ka fulin doonaan gobollada Koonfurta iyo Badhtamaha, Bariga Soomaaliya iyo Somaliland, sida qoraalka warkan lagu sheegay.
SOMALILANDPOST.NET