Addis Ababa (SLpost)- Wefti Somaliland u metalaya wada-hadallada Somaliya, oo maalmihii u dambeeyey ku sugnaa Dalka Itoobiya, ayaa caawa ka amba-baxay garoonka diyaaradaha ee magaalada Addis Ababa, iyaga oo ku sii jeeda magaalada Istanbul ee Dalka Turkiga.
Weftiga oo uu hoggaaminayo Wasiirka Arrimaha Dibadda Somaliland Md Maxamed Biixi Yoonis, ayaa todobaadkii socdaal ku tagay magaalada Addis Ababa, halkaas oo ay ugu diyaar-garoobayeen wada-hadallada la filayo inay dhawaan u furmaan Somaliland iyo Somaliya.
Sidaasna waxa lagu sheegay war-saxaafadeed caawa ka soo baxay Xafiiska Afhayeenka madaxtooyada, kaas oo u qornaa sidan: “Waxa caawa ka dhoofay garoonka diyaaradaha ee Dalka Ethiopia Guddida Somaliland ku metelaya wadadahadala u dhexeeya Somaliland iyo Soomaaliya oo muddooyinkii ugu danbeeyay ku sugnaa Magaalada Adis-ababa ka dib markii ay halkaasi ku qaateen aqoon iswaydaarsiyo iyo kulamo kala duwan oo ay kaga arinsanayaan sidii guulo ugala soo noqon lahaayeen wada-hadalada Dalka Turkiga.
Weftigan oo ku sii jeeda Magaalada istanbul ee Dalka Turkiga, halkaasi oo ay ka dhacayaan wejigigii Shanaad ee Wadahadalada Somaliland iyo Soomaaliya, ayaa iskugu jira Afar Wasiir iyo Saddex xubnood oo ka tirsan Golaha Baarlamaanka jamhuuriyada Somaliland.
Wasiirka Arrimaha Dibeda Somaliland Maxamed Biixi Yoonis oo isagu hogaaminaya Weftigaasi ayaa sheegay inay gudidan ku sii jeeda dalka Turkiga ee ka ambabaxay Magaalada Adis-ababa, ay halkaasi u tegayaan Wadahadalada u dhexeeya Somaliland iyo Soomaaliya kana rajaynayaan in ay guul kala soo laabtaan taasi oo qaranka iyo shacbiga somalilandba farxad gelisa.
Wasiirka Arrimaha Dibeda Somaliland waxa uu sheegay in uu guud ahaanba shacabka ku guubaabinaayo inay taageeradii lagu yiqiin la barbar istaagan guddidaasi, waxaana uu sheegay inay guddidani wakiil ka yihiin shacabka Somaliland sidaa awgeedna reer Somaliland meel ay joogaanba muujiyaan dedaal iyo niyad sami dheeriya, Somalilandna ay heli doonto waxay beesha caalamka ka rabto insha allaa sida ugu dhakhsaha badan.”
Wada-hadallada labada waddan oo filayey inay furmaan horaantii bisha, ayaa dib loogu riixay muddo aan la cayimin ka dib markii dawladda Somalia codsatay in dib loogu dhigo ilaa 15-ka bishan oo maanta ku beegan sababo la xidhiidha dhismaha xukuumadda Somaliland ee Somalia, haseyeeshee wasiirka arrimaha dibadda oo ka hadlayey jawaabta ay ka bixiyeen codsiga Somalia, ayaa sheegay inaanay dhankooda Xukuumad ahaan u diyaar ahayn 15-ka bisha, iyada oo ilaa wakhtigan aan la magacaabin xukuumadda cusub ee Somaliya oo iyagu kaqayb galka shirkaas ku xidhay qabyada xukuumaddooda. Haseyeeshee lama garan-karo wakhtiga loo muddeyey wada-hadalladan iyo bilowgooda.
SOMALILANDPOST.NET