Siyaasada dalka ka jira waa mid maraysa meeshii ugu xumayd abid, taas oo wax qabadkii iyo hawlihii shaqo ee dawlada hoos u dhigtay, waxa baryahan socda duufaan aad u adag oo ku dhufatay xisbiyada mucaaradka iyo muxaafadkaba , waxaana sabab u ah shaqsiyaad iyo dad doonaya in ay Somaliland god madaw dib u gasho.
Iyadoo duufaantaa siyaasadeed jirto oo aanay cidina fahan sanayn ayaa Waxaa la ilaabay dhalintii iyo horumarkoodii, waxa la ilaabay citiraaf raadintii, waxa la ilaabay horumarkii dalka ee la gaadhsiin lahaa,
waxaana la doonayaa in wadanka la baabiiyo, oo qofkastaaba wuxuu u ordayaa dan gaara , waxaana la isticmaalayaa kalmada ANiga taas oo siyaasiga sidiiba ka mamnuuc ah, waxa meesha ka baxay kalmada Inaga oo ah kalmad siyaasi ah kuna tusaysa inaad bulsho wax la rabto, runtii hadaad siyaasi tahay waxaad u socotaa waa bulsho iyo qaran waxaanad markasta wadataa taageerayaal siyaasiyiin iyo bulshaba leh, markaa waxaad isticmaashaa kalmada inaga oo ah dad ,dal iyo dhulba.
Duufaanta siyaasadeed ee ka bilaabantay Kulmiye kuna dhamaan doonta WADANI waa mid ay ka danbeeyaan shaqsiyaad dabada ku haya dawlada aanu jaarna nahay ee SOMALIA, waana mashruuc ay ka dambeeyaan shaqsiyaad gaara oo lacag, aan xad lahayn qaatay, taas oo ilaa hada lagu daba jiro , taas oo banaanka iman doonta wakhti dhaw.
Maxaa laynooga baahan yahay bulsha ahaan
Waxa laynooga baahan yahay, inaynu noqono dad dantooda yaqaan, inaynu noqono dawlad dhalintooda shaqo abuur u samaysa kana saarta mashquulka siyaasadeed, inaynu noqono dawlad xooga saarta ka midho dhalinta aqoonsi raadinta, adkaynta xidhiidhka caalamiga ah iyo wadamada jaarka ahba.
Aqoonsi in la raadiyo waxa ka muhiimsan in wadanka la dhiso oo siyaasada la dhiso , oo waxqabad iyo horumar la arkayaba la gaadho , oo wax soosaar la sameeyo, si baahida caalamku inoogu timaado, wadankeenu waa wadan haysta “Raw Material” oo ah alaab qaydhin, iyo dhul macdani ka buuxdo, sidoo kalana haysta bad balaadhan iyo khayraadkeedii oo dhan, ka faaideysiga wadanku wuxuu keenayaa citiraaf iyo barasho wadan, waxaa suura gal ah, haddii aynu nidaamkeena siyaasadeed wax ka badalno oo horumar iyo wax soosaar la arkayo aynu keeno , inaynaan citiraaf u baahaneen , citiraafkuna iman lahaa wakhti aynaan u baahnayn oo laynala baryi lahaa.
Citiraafka la rabaa waa horumar iyo wax soosaar, sidaa awgeed hadaynu horumar samaysano, waxsoosaar samaysano, siyaasad togan oo dhamaysa samaysano, dadkeena iyo dhulkeenaba ka faaideysano waxaa hubaal ah in aynu helnay wixii aynu citiraaf ka heli lahayn, marka aynu inaga is citiraafno ayaynu mid kalena helaynaa laakin wadooyinkii laynagu citiraafi lahaa ayaa wali inaga maqan. Taasna kor ayaan ku soo sheegay.
Waxaan hadalkayga ku soo gabagabaynaa , muhiimada wadankeenu waa in la horumariyaa oo laga faa, ideystaa khayraadkiisa iyo dhulkiisa iyo dadkiisaba marka intaa laga faaideysto ayaa la helayaa waxkasta oo loo dhaqaaqo, waxa laynooga baahan yahay , wadan mida, dad mida , siyaasada mida iyo bulsho isku duuban iyo dawlad u shaqaynaysa si cadaalad ah oo horumar hiigsanaysa.
Sidoo kale waxa laynooga baahan yahay inaynu il kula socono cidkasta oo rabta inay wadanka fawdo iyo qas galiya sida maanta dalka ka jirta.
Hadafkaygu waa inaynu horumarino waxsoosaarkeena , siyaasadeena, dadkeena, kana faaideysano dhulkeena, dadkeena, badeena iyo khayraadkasta oo aynu haysano si wadamada caalamka ee khayraadkoodii dhamaystay inoogu baahdaan, xidhiidh caalamiyana laynoola sameeyo, si loo barato magaceena iyo wadankeena iyo dadkeenaba .
Contact
Farhan Mohamed Sultan Nur (Rakad)
Mobile: 063-4400319
Email: farxaanmxd@gmail.com
Social activist/Free Journalism/Political analyst
Post number: RP 168
Berbera