Muqdisho (SLpost)- Dowladda Soomaaliya ayaa maanta soo saartay go’aan u muuqda in lagu bartilmaameedsanayo siyaasiyiinta mucaaradka ee xilka madaxweynenimo kula loolamaysa madaxweyne Maxamed Cabdilaahi Farmaajo.
Wasaaradda Amniga ee dowladda Federaalka ee Soomaaliya ayaa soo saartey qoraal ay ku xustey in aanan garoonka diyaaradaha Aadan Cadde lala geli karin wax hub ah.
Waxa ay wasaaraddu qoraalkeeda ku xustey in loo ogol yahay oo kaliya hubka in ay la galaan garoonka madaxweynaha dowlada federaalka, Raysal-wasaaraha, gudoomiyaha Aqalka Sare iyo Gudoomiyaha Golaha Shacabka ee Soomaaliya.
Go’aankan ayaa ka hor istaagaya madaxdii hore ee dalka soo martey iyo musharixiinta u taagan xilka madaxweynaha inay wax hub ah la galaan garoonka diyaaradaha.
Wasiirka Amniga ee dowlada Federaalka Xasan Xundubey Jimcaale oo arrintan wax laga weydiiyey, ayaa faahfaahin ka bixiyey go’aanka ay wasaaraddiisu soo saartay, waxaanu yidhi, “Adduunka ma jiro madaar lala galo dhishikayaal iyo qoryo. Meeshii ay ahayd inay muraayad u noqoto amaanka caasimada in hub lala galo maaha, amni darro ayuu sababi karaa oo dad baa kala shakiyi kara, ciidamada meesha soo galayaa isma yaqaanaan.”
“Markaa khatartaas ayaa cabashadeedu soo noq-noqotay. Maamulka madaarka ayaa dhowr jeer cabasho ka soo gudbiyey, markaa markii aanu isku noqonnay waxaanu isla qaadanay inay gali karaan dad gooban oo madaxda dowladda ah, sidaas ayaa la go’aamiyey,” Sidaas ayuu yidhi Wasiirka Amniga ee Soomaaliya.
Dhinaca kale, waxa go’aanka kasoo baxay Wasaaradda Amniga dowlada federaalka Soomaaliya si adag uga hadlay Guddoomiyaha Xisbiga Wada-jir Cabdiraxmaan Cabdishakuur oo caddaalad-darro ku tilmaamay.
Cabdiraxmaan Cabdishakuur oo ka mid ah musharixiinta u taagan tartanka madaxtinimada Soomaaliya oo la weydiiyey sida uu u arko go’aanka, waxa uu ku tilmaamay inuu yahay mid daba-socda culaysyo isa soo taraya oo sida uu sheegay ay dowladda Soomaaliya ku hayso murashaxiinta u tartamaya xilka madaxweynaha.
“Waxaanu u aragnaa wixii maalmahan ka socday magaalada daba-socda oo ah mid lagu beegsanayo murashaxiinta u taagan xilka madaxweynaha oo waa la ogyahay in dowladdu ciidamado dul-dhigaytay xaafadahayaga iyo xarumahayaga. Dhaq-dhaqaaqa magaaladu waa adag yahay, kulamada siyaasadeed lama qaban karo,” Sidaas waxa yidhi Cabdiraxmaan Cabdishakuur oo u warramay laanta Afka Soomaaliga ee Idaacadda VOA maanta.
Waxa uu siyaasigu ku dooday inay go’aankan u arkaan caddaalad-darro iyo cadaadis lala beegsanayo maadaama oo dadkii la tartamayey oo uu uga jeedo Madaxweyne Farmaajo isaga loo oggolaaday hubka ciidamadiisa, isla markaana aanay jirin cid dammaanad qaadi karta ammaanka murashaxiinta kale.
Somalilandpost.net
contact@somalilandpost.net