Hargeysa, (SLP)- Musharaxa madaxweyne ee xisbiga mucaaradka ah ee UCID Jamaal Cali Xuseen ayaa sheegay inay dawladdo dibadda ah kala hadleen in xukuumadda talada haysa cadaadis lagu saaro inuu doorasho dalka ka dhacdo.
Jamaal Cali Xuseen oo socdaal ku maraya waddanka Maraykanka ayaa sheegay inay wasaaradda arrimaha dibadda Ingiriiska ay kala hadleen sidii cadaadis loo saari lahaa xukuumadda talada dalka haysa, sidii ay doorashada u hirgelin lahayd. “Mawqifkayaga ku waajahan doorashada dib u dhaceeda waxaanu la wadaagnaa tii ay is-bahaysoga mucaaradku go’aanka ka gaadheen, farriintaas ayaananu u gudbinay waddamo aanu socdaal ku maraynay oo qaarkood aanu la kulanay wasaaraddaha arrimaha dibadda sida dalka UK.”
Jamaal Cali Xuseen oo ka hadlaya saamaynta taban ee ay yeelan karto dibu dhaca doorashadu waxa uu yidhi. “Waynu ognahayoo Somaliland dimuqraadiyaddeedu waa waxyaabaha la inagu majeerto ee indhaha caalamka inoo soo jeediyay, dawladdii hore ee uu Daahir Rayaale madaxda ka ahaa doorashooyin wanaagsan ayay dalka ka qabatay, kuwaasoo indhaha caalamka inoo soo jeediyay, kuwaasuun baananu doonaynay inay sidaa inoogu sii socdaan.”
Musharaxa madaxweyne ee UCID oo ka hadlaya mawqifkooda xisbi ee dibu dhaca doorashada waxa ka mid ahaa hadalkiisii. “Annagu dalka ma doonayno inaanu dhibaato gaadhsiino sidii Kulmiye odhan jirayna odhan mayno dagaal baanu galaynaa, laakiin waa inaanu culays mucaarad ahaan samayno oo dadka wacyigelino oo caalamka wacyigelino, si doorashooyinku inoogu dhacdo, taasna xoog kuma doonayno ee wixii wacyigu keeno waanu ogolnahay, wixii farsamo ahna waa wax la ogolaan karo, dibu dhaca doorashaduna imika may dhicine, waxay dhacday laba sanno ka hor markii ay xukuumaddu carqaladaysay xeer 37 ee diiwaangelinta madaniga ah iyo diiwaangelinta cod-bixiyeyaasha doorashada, markaa caalamkana waxaanu u sheegnay in kordhinta ama dibu dhaca doorashadu uu dimuqraadutada Somaliland dhaawacayo. Dhibaatada kale ee jirta ayaa ah in xataa baarlamaanku aanu ansixin xeerkii lagu dooran iyaga laftood.”
Jamaal Cali Xuseen oo wareysi siiyay shabakada Qurbejoog ayaa sheegay inuu aaminsan yahay in doorashada xilliga ay komishanku cayimeen ka hor lagu qaban karayay doorashada. “Arrintaa komishanku waa shaqo iyaga u taalla oo hawshooda ayay ahayd, laakiin anigu shaqsiyan waxaan arkayay in doorashada lagu qaban karayay December ama January.” ayuu yidhi.
Somalilandpost.net