Gabayga “Dheelallo” Waa gabay ka hadlaya dhibaatada Tahriibta iyo Dhoofka Dibadaha layska joogo Inaanu Faa’iido adduuun iyo mid aakhiro midna lahayn ..
- Dha’da gabayga waayadan ma curin, dhihitin kiisiiye
- Dhumucdiyo mullaaxdii markuu, waayay baan dhigaye
- Dhafan-dhaaf markii loo tirshee, dhuuxa laga saaray
- Dhafoor-xiirtu goortay tirsheen, waan ka dhiidhiyaye
- Misna dhaadanaan maaya oo, waa I dhibayaaye
- Balaan dhololo maantoo kalaan, Dhiilla mariyaaye
- Gabay wali dhud buu leeyihiyo , dhaabad iyo qaabe
- Dhugmo iyo waxaa loo tirshaa, maan lasoo dhuraye
- Ujeeddooyin dhaadheer ayaa, Loo dhigaa Hadafe
- Dhibta iyo rafaadkiyo naxliga, dhaymo waw yahaye
- Dhimirkaaga maankiyo qalbiga, waa u dhaadhiciye
- Balaan dhuuxo maantana tixbaan, dhaab is leeyahaye
- Dhoof waa la aadaa ragoow, dhulalka gaaleede
- Waana loo dhibaatoon jiroo, maaha dhalanteede
- Nin waxbarasho dheeraada raba, oon dhulkani oollin
- Ama cudur dhibaayoo dawada, dhaanish lagu sheegay
- Ama diinta oo lala dhex maro, qoomka wada dhoohan
- Saddexdaa ninkii dhaafsan baa, diinta dhaawacaye
- Dheeldheel ha moodina inaad, Yurub dhex joogtaane
- Ka dhawrsada dadkaygoow xumaha, gaalka dhagartiisa.
- Dhallintii tahriibtaan lahaa, dhaayahow fura’e
- Dhul shisheeye kii aaday baan, soo-rogaal-dhicine
- Dhalandhoolka baahida markaad, dhugato waa yaabe
- Hablii dhiibsanaan jiray mar hore, dhixirki loo siibye
- Ragga dhiidhigoodii lawaa , Dhiigi kici laaye
- Saxaraha ku dhimataa amaba, doon dhexdeedaba’e
- Kol hadduu dhif iyo naadir yahay, nolosha ruux dhaadi
- Dhulkaagii inaad aamintaa , saw xal dhaba maaha ?!!
Xasan Daaci Abiib Faarax
Hargeisa, Somaliland
Sheeko Wadareed Bahda Hiilqalin/ Tahriib