New York (SLpost)- Dhakhtar u dhashay waddanka Maraykanka, xaruntiisuna tahay magaalada New York oo dhowaan socdaal ku tagay waddanka Guinea ee Galbeedka Afrika, ayaa laga helay Cudurka Ebola, ka dib markii uu ku noqday waddankiisa, sida ay faafiyeen warbaabihinta dalkaasi.
Dr Craig Spencer oo u shaqaynayey Ururka Dhakhaatiirta aan Xuduudka lahayn (Medecins Sans Frontieres [MSF]), ayaa la sheegay inay soo ridatay xumadda Xannuunkan maalintii Khamiista ee shalay oo xaaladdiisa caafimaad lagu karantiimeeyey goob-caafimaad oo ku taala magaalada New York.
Ninkan ayaa noqonaya qofkii u horreeyey ee xannuunkan laga helo magaalada ugu weyn Maraykanka ee New York.
Dr Spencer oo xannuunku soo ritay, waxa uu gelinkii hore ee Khamiistii shalay la dhacay Xummad xad-dhaaf ah iyo Shuban-biyood hor leh oo lagu arkay, iyada oo la dhigay cusbitaal ku yaala magaalada New York, halkaas oo xaaladdiisa caafimaad Karantiin lagaga taxaddirayo inuu cudurku faafo lagu galiyey, sida ay sheegeen saraakiisha caafimaadka ee magaaladaasi.
Wararku waxa ay intaas ku darayaan in saraakiisha caafimaadku isla markiiba baadhitaanno ka bilaabeen magaalada New York iyaga oo daba-gal ku sameeyey cid kasta oo ninkani xidhiidh la sameeyey.
In ka badan 4,800 oo qof, ayaa cudurka Ebola ugu dhintay waddamada Liberia, Guinea iyo Sierra Leone ilaa bishii March ee sannadkan oo fiditaanka cudurkani faraha ka baxay. Waxa jira hal qof oo Maraykanka ugu dhintay cudurkan, balse dhowr maalmood dhimashadiisa ka hor, ka tagay waddanka Liberia oo asal ahaan uu u dhashay.
Dr Spencer waxa uu noqonayaa qofkii Afraad ee cudurkan laga helo gudaha dalka Maraykanka
Laba Kal-kaaliso Caafimaad oo ka hawl-galayey Cusbitaal la dhigay ninka u dhashay dalka Liberia ee socdaalka ku tagay Maraykanka, ayaa iyagana laga helay Astaamaha Ebola, in kasta oo xaaladdooda caafimaad lagu baxnaaninayo cusbitaallada dalka Maraykanka.
Dadka Cudurka Ebola ku dhacdo, waxa ay dadka kale u gudbin karaan kaliya marka Astaamihiisu ka soo if-baxaan, waxaana cudurka laysaga gudbin karaa Dheecaannada iyo Dareerayaasha Jidka oo qofka kale jidkiisu taabto, sida ay sheegeen Khubarada Caafimaadku.
Dhinaca kale, Waddanka Mali ee Galbeedka Afrika, ayaa xaqiijiyey qofkii ugu horeeyey dalkaas ee Cudurka Ebola ku dhacdo, taas oo ah gabadh yar oo Laba Jir oo dhowaan waalidkeeda socdaal ku tageen dalka Guinea oo ah saddexda dal ee cudurkani faraha baas ku hayo.
SOMALILANDPOST.NET