Bulshadii ku dhaqnayd deegaanka Ceelbardaale ee Gobolka Gabiley oo laga soo barakiciyay dhulkii ay deganaayeen ka dib markii ay isku bahaysteen Xukumada maanta jirta iyo Maleeshiyaad ka soo jeeda Gobolka Awdal oo weerar ku soo qaaday Deegaanka Buqdhada ee Ceelbardaale bishu markii ay ahay December 6, ka dibna Gubay Tuulada Buqdhada, oo gubay dhismayaashii, wixii hanta hoos taalayna qaatay, waxay maalintaas ay maaleeshiyaada Awdal ka soo jeedaa ku dileen buqdhada wiil dhallinyaro ah oo da’adiisu ahayd 18 jir. Si arxan daro ah ayay maleeshiyada ka soo duushay Gobolka Awdal u dileen wiilkaas aan waxba galabsan ee la midka ahaa dadkii lagu laayay SEEMAAL. Wasiirka Arrimaha gudaha iyo Xukumadiisuna may soo hadal qaadin Dilkaas, xiitaa kamay tacsiyadayn ehelkiisii iyo Bulshadii u ka baxay. Waana dhaawac Xukumada Siilaanyo ku maqan abaalkeedana ay heli doonto hadii eebo idmo, kolay doorashana way soo socotaa, Waxa intaas ka sii daran in Maalintii bishu ahayd December 6, Waxa Deegaanka Ceelbardaale tegay Wasiir Duur iyo Xirsi oo soo arkay Tuulada Buqdhada oo la gubayo oo weli guryihii sii qiiqayaan, oo hantidii ay fadhataysanayaan Maleeshiyo ka soo duushay Gobolka Awdal, Wasiiradu waxa kale oo ay arkeen Barakaca iyo Silica haystay dadkii laga soo barakiciyay SEEMAAL iyo Deegaanka ku xeeran ilaa Buqdhada ee Gobolka Gabiley, Wasiir Duur malaha waabu ku farxay silica iyo darxumada ku habsatay Bulshada Reer Ceelbardaale iyo Gobolka Gabiley. Wasiir Duur haba yaraatee kamuu damqan dhimashada iyo Darxumada Soo gaadhay bulshadaas, afkana wuu ka xidhay.
Waxa intaas u dheer Ciidamada Booliiska ee la dhigay Buqdhada oo dadkii reer Ceelbardaale u diiday iyaga iyo xoolahoodiiba inay ka cabaan biyaha Tuulada Buqdhada oo ku taal badhtamaha Gobolka Gabiley iyaga oo garab siinaya Beesha ka soo jeeda Gobolka Awdal. Halkii ay ahayd inay dhexdhexaad ahaadaan oo ay sugaan Nabadgelyada. Waxay ahayd inay Xukumadu Ciidamada Geyso Seemaal, Ruqi iyo Xamarta balse may ahayn inay badhtamaha Gobolka Gabiley dhex dejiso Ciidan, meesha wax ka dhaceen Waa Seemaal, labada beeloodna ma wada degaan Buqdhada ee waxay wada degaaan dhul ka shisheeya Tuulada Seemaal ee Gobolka Gabiley.
Xukumadu waa inay Talaabo dhexdhexaadnimo ah qaadaa oo dadka soo barakacay caawisaa amaankoodana sugtaa oo ay ku noqdaan dhulkii ay ka soo qaxeen. Xukumada waa inay Dhiiga ka daatay labada dhinacba Xustaa oo ay iska daysaa Taageerida Beesha Awdal, Cadaaladu waa in la raadiyo Dadkii dilalkii labada dhinacba geystay oo la soo qabto iyo inay Xukumadu Fuliso Go’aankii Guurtida ee Ceelbardaale laga soo saaray 2009. Si shaqaada Ceelbardaale loo dhameeyo iyo in Xukumadu sii dayso Salaadiinta iyo Siyaasiyiinta xidhan si ay uga qayb-qaataan xalka.
C/raxmaan Maxamed
Hargeisa-Somaliland