Markaad ku soo dhawaato magaalada Boorama ishaadu waxay ku dhacaysaa buuro dhaadheer oo gar ka gar sinta isku haya,bandarkana ku gadaama.Inta aanad magaalada soo gelin ayaad laba buurood dhexdooda muuqaalka magaaladu iska kaa tusayaa. Waa magaalo degan oon buuq,bulaan iyo bulxantoona lahayn.Dhismayaasha ku yaalaa way qurux badan yihiin.Dadka ku dhaqani waa dad aamusan oo ruux waliba wixii dantiisa ku foofsan yahay.Waa goob aqooneed oo dadka ku dhaqani ka aragti dheer yahay dadka kale ee soomaaliland ku dhaqan, sababtoo yar iyo weyn waxa loo faydan yahay waxbarasho; taabkana waxa ugu wada jira agabkii xoogsiga iyo buuggii iyo qalinkii.Meelaha naftu markay tagto ku xasisho una soo boholyowdo waxa ka mid ah jaamacadda iyo seeraha oo labaduba dhimirkaaga ku suntanaayana xasuus ma guurto ah oo kolka aad laba baad isku qabatada hortaada keenaaya,dareenkii kugu dhashay markii aad dhexjoogtay. Abwaankii yidhi:
Indhihii basaasawo
Boorama ma aragteen.
Ma gefin ee run biyo kama dhibcaana ayuu labadan meeris ku soohay. Magaalo aqoomeedda Boorama waxa iiga soo kordhay shalay mar aan safar dalxiis ku tagay aniga iyo hal-door qiimo badnaa arrin cajiiba. Laf aan wax qumman jaamacadda ka durugsanayn oo layidhaa Cammuudii hore ayaannu xogteeda kala sheekaysanay madaxweyne ku xigeen jaamacadda Cammuud aqoon yahan Diiriye waxaannu nagu yidhi” Waxay ahaan jirtay xarun lagu sii dhixiyo dadka adoomaha ah ee qaaradda yurub iyo ameerika loo iibgeynaayo ee marsada Saylacna laga sii dhoofinaayo.Waxaa soo gaadhay qalcadaha oo in doora dhisan,waxa kale oo ka sii muuqday silsiladii lagu xidhi jirey dadka.Dadka soomaalida ah qudhooda ee meelaha ka dhawdhaw niman tababaran ayaa xadi jirey gaar ahaa maatida jilicsan een iska caabin karayn. Bulshaduna waxay isu qancin jireen xanfalay ayaa hebel ama hebla qaadatay. Haddii dadku meeshaa sideeda u dayn lahaayeen,maantaba sayn-cadda lacag baa lagaga furi lahaa. Waxaanay noqon lahayd goob dalxiis oo laysugu yimaaddo” Intaa kolkuu sheegay ayuu hadana guryihii aannu agtaagnayn waxooga nooga taataabtay oo yidhi “Guryahani waa dugsigii hoose kuwaasina[waa dhisme dhanka bogox/galbeed naga qabanaayeyna] waa dugsigii sare imika se jaamacaddaa ku jirta. Qayb ka mid ah kulliyada beeraha ayaa ku jirta inta kalana shaqaalaha jaamacadda ayaa degan” Wuxuu ahaa buuni cilmi badani ka muuqdo oo aanay foolkiisa farxadda ka faaruqin. wuxuu si kaftana oo hadana quusi ka madhnayn noogu yidhi :-” Ardayda jaamacadda waxaannu u dhignaa cilmigii ardayga dugsiga sare loogu talo galay, aqoonteennu hoos bay u socotaa. waxa keliya ee aqoontaa laga korodhsaday in dadkii xaragoodeen oo iska naceen qorigii.” Waxaannu u dhaqaaqnay jihada waqooyi bari oo uu ka muuqday xafiiskii maamulaha dugsigii Cammuud oo dumay. Waxa sii taagnaa haykalkii guud xafiiska. la soco
Mawliid Aadan