Ceerigaabo, (Slpost)- Laba askari oo ka tirsan ciidamada Qaranka Somaliland iyo ruux dumar ah ayaa geeriyooday, kow iyo toban kalena way ku dhaawacmeen kadib markii galabta ay koox dablay hubaysani weerar ku qaadeen guri lagu casuumay Wasiirka Warfaafinta iyo Wacyigelinta Somaliland Md.Axmed Cabdi Xaabsade iyo Taliyaha Ciidanka Asluubta Maxamed Xuseen Faarax “Xiirane” oo ka mid ah weftigii loo xil saaray soo afjarida khilaaf gacan ka hadal sababay oo dhawaan dhex maray laba beelood oo walaalo ah oo wada dega magaalada Ceerigaabo ee xarunta gobolka Sanaag.
Dablaydan weerarka ku qaadday gurigan lagu casuumay Wasiirka Warfaafinta iyo Taliyaha Ciidanka Asluubta oo wakhtigaas shir duceed kula lahaa waxgarad ka mid ah deegaanka ay ka soo jeedaan. In kasta oo weerarka dablaydu ku ekaysiisay masuuliyiinta qaran uu Fashilmay, haddana waxa muuqatay in qorshahoodu ahaa inay khaarajiyaan labada masuul ama ay afduub kula tagaan.
Dhinaca kale, Wasiirka arrimaha gudaha ee Somaliland Md.Maxamed Nuur Caraale “Duur” oo hogaaminayay weftigan ka socday Xukuumada Somaliland oo shir jaraa’id ku qabtay magaalada Ceerigaabo ayaa sheegay in Wasiirka Warfaafinta oo uu weheliyo taliyaha ciidanka asluubta ay kulankaas kula lahaayeen mid ka mid ah guryaha magaalada ceerigaabo kaas oo la xidhiidhay sida uu xusay Xoojinta amaanka . wasiirka arimaha guduhu waxa uu tilmaamay in kulankaas nabadeed ay soo weerareen koox dhalinyaro ah oo hubaysan oo ka soo jeeda beesha ay waxgaradkeeda kulmayeen .Md.Maxamed Nuur Caraale Duur waxa uu intaas ku daray in ciidanka qaranka iyo ilaalada labada mas’uul ay iska difaaceen weerarka lagu soo qaaday iyadoo iska hor imaadkaas ay ku geeriyoodeen Sadex askari oo ciidanka qaranka ka tirsan wasiirka arrimaha guduhu waxa uu cadeeyay in kooxdan dablayda hubaysani ay dileen Hooyadii gurigeeda kulanka lagu qabtay.
Wasiirka arrimaha gudaha ee Somaliland waxa uu hadalkiisa ku sheegay inay gacanta ku dhigeen 11 qof oo kooxdan dablayda ah ka mid ah kuwaas oo laba ka mid ahi ay dhaawac yihiin waxaanu intaasi ku ladhay in xaalada magaaladu ay degen tahay isla markaana ay ciidamada amaanku gacanta ku hayaan hawlaha nabadgalyo ee magaalada Ceerigaabo.
Weerarka ay kooxdani dablayda ah ku soo qaadday masuuliyiinta Qaranka isla markaana aanay ka daahsoonayd qorshaha loogu talogalay, waxa ay wararka qaar sheegayaan in hawl-galkan laga soo abaabulay Maamul goboleedka Puntland oo faro-gelin qaawan ku haya deggenanaanshaha ammaanka gobollada Sool iyo Sanaag
Somalilandpost.net
contact@somalilandpost.net