Bristol (SLpost)- Afar iyo toban Dhalinyaro Soomaali ah oo ku nool magaalada Bristol ee dalka UK, ayaa maanta maxkamad loo soo taagay dambiyo ah inay kurfsi-wadareed u geysteen gabdho aan qaan gaadh ahayn iyo tacaddiyo kale oo ay ka mid yihiin ka-ganacsiga Jidhka gabdhaas.
Xaakimka maxkamadda Dacwadda qaadayay, ayaa loo sheegay in shan ka mid ah 13-ka qof ay kufsadeen gabadh16 jir ah halka walaasheed oo 14 jir ahna uu kufsaday mid ka mid ah dhalinyarada oo la sheegay inuu ku dhex-kufsaday Hotel ay deggenaayeen wakhti habeennimo ah.
Baadhitaan ay booliska sameeyeen, ayaa lagu ogaaday koox kale oo Soomaali ah oo tacaddiyo u geysanayay afar gabdhood, kuwaasi oo la siiyay lacag gaadheysa 30 gini iyo maandooriye si ay ula seexdaan rag ka da’ weyn, iyada oo caddeymo maxkamadda la horgeeyey sheegeen in gabdhaha qaarkood laga dhaadhiciyay in dhaqanka Soomaalida uu ka mid yahay in ragga ay gabdhaha kala beddeshaan.
Ciidanka booliiska ee Avon iyo Somerset ayaa sheegay in kiisas la mid ah oo faraxumaynta hablaha yaryar ka dhacday xaafadaha Oxford iyo Rochdale, halka aoo rag ka soo jeeda qaaradda Aasiya lagu soo oogay dembiyo, inkastoo kiisaska loo haysto dhalinyaradan kii u dambeeyey yahay.
Gabadh da’deeda lagu sheegay 13 sannadood jir oo la sheegay in loo geeyey saddex nin oo kala duwan ayaa mar dambe iyada nafteeda u baqanaysa awgeed, waxa ay dacwad geysay saldhig booliis oo ku dhow.
Lix ka mid ah dhalinyaradan ayaa xilligan u bilaabantay xabsi gaadhaya 75 sannadood, ka dib markii lagu helay dembiyo la xidhiidha kufsi, faraxumayn hablo aan qaadh-gaadhin iyo inay jidhkooda ka ganacsadeen, halka todoba kale usbuucan lagu helay dembiyo isugu jira kufsi
Dhalinyarada hore xabsiga loogu xukumay falalkan ay geysteen oo ay ku caddaatay, ayaa magacyadoodu kala yihiin Liibaan Jaamac oo 21 jir ah, Mustafe Faarax oo 21-jir ah, Carafaat Cismaan oo 20 jir ah, Iidle Cismaan oo 22 jir ah, Cabdilaahi Aadan oo 20 jir ah, Siciid Sakariye oo 22 jir ah, Mustafe Diiriye oo 22 jir ah iyo wiil ay ilmaadeer yihiin oo lagu magacaabo Maxamed Jaamac oo 20 jir ah, kuwaas oo dhammaantood loo xidhay xad-gudubyo galmada ah iyo ganacsiga daroogada.
Halka kuwa Maxkamaddu Arbacadii shalay Xukuntay ay kala yihiin magacyadoodu Maxamed Jaamac oo 24 jir ah, Maxamed Daahir oo 22 jir ah, Yuusuf Cabdirisaaq oo 20-jir ah, Cumar Jimcaale oo 20-jir ah, Cabdirashiid Cabdilaahi oo 21-jir ah iyo Sakariye Sheekh oo 21-jir ah, ayaa dhammaantood lagu helay inay geysteen tacaddiyo xagga galmada ah oo lagula kacay gabadho aan qaan-gaadh ahayn.
Bulshada Soomaalida ee Bristol, ayaa arrintaasi cambaareysay, waxaana warbixin qoraal ah oo ay soo saareen ku sheegeen in falkaasi uu yahay mid aan loo dulqaadan karin.
“Waxay ku kaceen ficillo axmaqnimo ah oo aan la illaabi karin oo ay u geysteen dadka nugul ee bulshada ka mid ah. Bulshada Muslimka ah ee Bristol waxay caddeynaysaa inaanu gebi ahaanba iska bari yeelno falkan oo aanu si niyad ah u cambaareynaynayo,” Sidaas ayaa lagu sheegay war-saxaafadeedka bulshada Soomaalida ah ee ku dhaqan magaalada Bristol.
SOMALILANDPOST.NET