Saddex qof oo ku dhaawacmay weerar dabley hubaysan xalay ku qaadeen Meherad Ganacsi oo ku taala magaalada Boorama, ayaa ka warrammay qaabka uu u dhacay weerarkaas oo ay goob-joog u ahaayeen iyo sida ay dhaawacyadu ku soo gaadheen.
Weerarka oo fiidnimadii xalay abaaro 9-kii ay fuliyeen Dabley aan haybtooda la aqoonsan oo ku hubaysan Hubka fudud, ayaa lagu weeraray meherad Ganacsi oo uu leeyahay Ganacsade Muuse Caamir oo si weyn looga yaqaanno magaalada Boorama, waxaanay halkaas ka qaateen lacag meheradda taallay, waxaanay ka hor intii aanay ka bixin goobtaas dhinac kasta u rideen rasaas aanay ay hoos ugu dhigeen dadweyne tiro badan oo xilligaas ku sugnaa meherado goobta meheraddu ku taallo oo ah suuqa faras-maagaalaha Boorama, taas oo sababtay inay ku dhaawacmaan saddex qof oo shacab ah.
Saddex qof ee dhaawacyadu soo gaadheen oo dhammaantood rag ah, ayaa dhacdadan uga warramayey suxufiyiin ku booqday cusbitaalka magaalada Boorama oo lagaga daawaynayey dhaawacyada soo gaadhay, waxaanay sheegeen inay tahay arrin ku cusub degmada Boorama oo aanay hore ula kulmin.
Cismaan Cabdilaahi Kheyrdoon oo ah nin dhalinyaro ah oo dhaawac ka soo gaadhay Gacanta midig, ayaa warbixiyey dhacdadan, waxaanu yidhi, “Waxaan fadhiyey meherad cuntada waddaniga ah samaysa, anagoo kuraasta fadhina oo cashada sugayna, waxa mar kaliya bilaabay rasaas, dabadeed dadkii way wada yaaceen, waxaanu galnay meherad kale, dabadeed dadkii oo dhami beerka ayay dhulka saareen. Markay xabbaddu socotay ilaa Toban daqiiqo, ayay rasaastii yaraatay, dabadeedna waan soo kacnay, qof kastaana wuxuu caymaday (Orday) si uu naftiisa u badbaadiyo. markaas ayaan anigu isku arkay Dhiig gacanta iga socda.”
Cismaan oo hadalkiisa sii watay, waxa uu yidhi, “Haddaanu reer Boorama nahay waxani waa wax nagu cusub oo Boorama way ku fiicnayd nabadda, aniguna intaasaan ku soo le’ekaaday oo ma maqal Xabbad dhacaysa.”
Mid ka mid ah Hawl-wadeennada ka xoogsada meheradda ay dableydu weerartay oo isaga dhaawaciisu ka culus yahay laba qof oo kale, waxa uu yidhi, “Meheradda waan ka shaqeynayey, laakiin xilligaas lacag baan ka sarrifanayey, markii ay xabbaddu igu dhacday, waanu kala qarsoonnay dadkii, markaas ayaa iigu dambaysay oon anigu ka dhex-baxay.”
Sidoo kale, Nin ka mid ah dadweyne ka adeeganeyey meheradda oo rasaasta ay Dableydu ridayeen kula kulmay xilli uu meheradda ka soo baxayey, ayaa ka warrameyey sida wax u dhaceen iyo dhaawaca soo gaadhay, “Rasaastu waxay naga heshay annagoo joogna sarrifle weyn oo ku yaala magaalada Boorama, mana garanayno cid aanu tilmaami karno. Markii aan sariiflaha ka soo baxay, ayay xabbaddu bilaabantay, anigana markaasay igu dhacday oo lugta ayay iga qabsatay, laakiin waan iska cararay oo dadkii caymadayey (baxsanayey) ayaan ka mid noqday, waayo meeshu goob dagaalbay noqotay, xabbadduna aad bay u dhacayeen, inay iyagu is-difaacayeen iyo inay xabbaddu iska dhacaysa ma kala caddeyn karo.”
Badhasaabka Gobolka Awdal Maxamuud Cali Saleebaan oo Wargeyska Himilo uga warramay dhacdadan habeen hore, ayaa sheegay inaanay aqoonsanayn cidda weerarka fulisay, balse ay ciidamada amaanku markiiba baacsadeen, magaaladana iskala baxeen ragga weerarka fuliyey oo uu tiradooda ku sheegay inay ahaayeen Lix Nin oo xilliga ay fulinayeen hawl-galan Isu-qaybiyey Saddex gudaha u galay meheradda iyo saddex kale oo bannaanka ka joogay meheradda oo dusha ka ilaalinayey.
SOMALILANDPOST.NET