Oodweyne (SLpost)- Maareeyaha Hay’adda Horumarinta Jidadka ee Somaliland Axmed Yuusuf Maxamed iyo wefti uu hoggaaminayo, ayaa gaadhey magaalada Oodweyne ee xarunta gobolka Daad-madheedh.
Ujeeddada safarka weftiga ayaa la xidhiidha sidii ay u indho-indhayn lahaayeen Jidka u dhexeeya magaalooyinka Burco iyo Oodweyne, kaas oo la qorsheeyey in dhismihiisa la bilaabo horaanta sannadka cusub ee 2021-ka.
Weftiga Maareeyaha hay’adda Jidadka waxa qaabiley oo duleedka caasimadda gobolka Daad-madheedh ku soo dhaweeyey masuuliyiin uu ka mid yahay Duqa degmada Oodweyne Cabdixakiim Nuur Muuse oo halkaas ka sheegay inay maamul ahaan diyaar u yihiin wax kasta oo looga baahdo, isaga oo baaq u diray dadka degaanada ay waddadu mari doonto oo uu u soo jeediyey in ay u diyaar garoobaan sidii ay u garab istaagi lahaayeen shaqaalaha ka hawlgeli doona dhismaha wadadan.
Geesta kale waxa iyaguna halkaas ka hadlay maareeyaha guud ee mashruuca wadada Ceerigaabo iyo Burco Eng Maxamed Cabdi Qorshe iyo Maareeyaha guud ee Hay’adda Wadooyinka Jamhuuriyadda Somaliland Md Axmed Yuusuf Maxamed, waxaanay tilmaameen in ay dhowaanahan wadeen daraasad ku saabsan dhismaha wadadan, isla markaana loo qaybin doono wejiga kowaad iyo wejiga labaad , waxaanay ugu baaqeen shacabka degaanka Oodweyne iyo degaanadda kale ee hoos yimaada in ay soo dhoweeyaan shaqaalaha ka shaqayn doona dhismaha wadadaasi.
Wadada isku xidhi doonta magaalooyinka Burco, Oodweyne iyo Hargeysa ayay masuuliyiintani sheegeen in ay dhowaan bilaabmi doonto dhismaheedu, iyaga oo tilmaamay in socdaalkoodani salka ku hayey in ay ogaadaan goobtii ay shaqaaluhu degi lahaayeen iyo goobtii qalabka la dhigi lahaa iyo in ay la socodsiiyaan dadka reer Oodweyne in la bilaabi doono dhowaan wadadii uu madaxweynaha Jamhuuriyadda Somaliland Md Muuse Biixi Cabdi hore u dhagax dhigay.