Frankfurt (SLpost)- Mudaharaad ballaadhan oo lagaga soo horjeedo mastaafurinta sharci-darrada ah ee dadka magan-gelyo doonka eek u sugan dalka Jarmalka, ayaa maalintii Khamiistii ee todobaadkan ka dhacay magaalada Frankfurt ee gobolka Hessen ee Galbeedka dalka Jarmalka.
Muddaharaadkan oo ay soo abaabuleen Jaaliyadaha Soomaalida iyo Eretariyaanka ku dhaqan gobolka Hessen ee magan-gelyo doonka ku jooga dalkaas, kuwaas oo taageero ka helayay ururro xuquuqda bani’aadamka u dooda ee maxalliga ah, ayaa abbaaro 2-dii Duhurnimo ee shalay wakhtiga dalka Jarmalka ka bilaabmay Madaarka diyaaradaha ee magaalada Frankfurt, waxaanu bannaan-baxan oo qaatay muddo Afar saacadood ku dhow uu sababay inuu hakad ku yimaaddo habsami u socodkii hawlaha madaarka.
Dadka bannaan-baa sameeyey oo tiradoodu gaadhaysay 1,000 qof oo isugu jiray Soomaaliy iyo Eretariyaan ku nool gobolka Hessen ee dalka Jarmalka, ayaa ujeeddadiisu ahayd mid ay kaga cabanayaan mastaafurin sharci-darro ah oo gobolkaasi ku hayo dadka magan-galyada weydiista ee Farahooda lagaga soo qaaday waddamada kale ee Yurub sida Talyaaniga, Austria iyo dalalka kale ee Koonfurta iyo Bariga Yurub.
Warbaabinta Gudaha iyo kuwa Caalamiga ah ee ka hawl-gasha magaalada Frankfurt, ayaa goob-joog ka ahayd bannaan-baxa ay dadkani samaynayeen, iyada oo la arkayey wariyeyaal ka tirsan warbaahinta ugu caansan dalka Jarmalka oo ku sugnaa goobta mudaharaadku ka dhacayey
Waddanka Jarmalka, gaar ahaan gobolka Hessen ee magaalo-madaxdiisu tahay Frankfurt, ayaa kula dhaqma dadka magan-gelyo doonka ah inay u mastaafuriyaan Waddamadii u horreyey ee ay Yurub ka soo galeen ee Faraha lagaga qaaday.
Intii uu mudaharaadku socday waxa bannaan-baxayaashu socod ku mareen Xafiisyada Shirkadda diyaaradaha Luhthanka Airways oo qandaraas ku qaadata Dadka la celinayo iyo Xarunta Booliska ee Madaarka, halkaas oo dadku muddo badan bannaan-baxa ka horsamaynayeen.
Guddoomiyaha Jaaliyadda Soomaalida gobolka Hessen ee bannaan-baxa soo abaabushay Maxamuud Cumar Qawdhan oo ka mid ah qaban-qaabiyeyaasha bannaan-baxan oo nooga warramay qaabka loola dhaqmay intii ay mudaharaadka cabashada ka dhigayeen Madaarka magaalada Frankfurt, ayaa sheegay in isla markiiba laga jawaabay cabashadooda isla markaana ay la hadleen saraakiil ka tirsan Shirkadda Diyaaradaha iyo maamulka Madaarka.
“Markii dambe dadku waxay ku soo noqdeen Terminal One oo ah halkii laga bilaabay mudaharaadka, waxaana halkaas nagula hadlay masuuliyinta ugu saraya diyaarada Luhtthanka Air iyo madaxda madaarka Frankfurt Mr Lukasgerbig, waxaanay dhammaantood noo ballanqaadeen in in hoos loo eegi doonoo cabashoonyinkayaga,” ayuu yidhi Guddoomiyaha Jaaliyadda Soomaalida gobolka Hessen.
Maxamuud Cumar Qawdhan, waxa uu dhammaan dadkii ka qayb-galay bannaan-baxa uga mahad-celiyey sida wanaagsan ee ay isugu abaabuleen inay tabashooyinkooda u gudbiyaan cidda ay ka cabanayaan, waxaanu sheegay inay mar labaad u ballansan yihiin bannaan-bax kale oo ay cabashadooda ku sii xoojinayaan kaas oo 7-da bisha June ee sannadkan ka dhici doona magaalada Darmstadt ee isla gobalka Hessen ee dalka Jarmalka.
Somalilandpost.net
Franfurt/Hessen
Germanay