Hargeysa (SLpost)- Maamulka sare ee Baanka dhexe ee Somaliland, ayaa soo saaray go’aamo ku socota Sarrifleyaasha Dalka qaarkood, kuwaasi oo baalmaray Qiimaha Sarrifka ee Baanka dhexe u jaan-gooyey inay ku sarrifaan Lacagta Dollarka iyo Shilinka Somaliland.
Shir ay Magaalada Hargeysa ku yeesheen Madaxda Baanka dhexe ee Somaliland oo uu hoggaaminayo Agaasimaha guud ee Baanka dhexe Maxamed Qaasim iyo Ururka Sarrifleyaasha Dalka, ayaa si Wada jir ah u qabteen Shir-jaraa’id, kaasi oo ay farriin ugu direen sarrifleyaasha baal-maray Qiimaha saxda ah ee Baanku u dejiyey in lagu sarrifo Lacagaha Qalaad iyo Shilinka Somaliland.
Ugu horrayn, Agaasimaha guud ee Baanka dhexe Maxamed Qaasim oo halkaa ka hadlay, ayaa sheegay inay Maalmihii u dambeeyay soo baxeen Sarrifleyaal Lacagta Dollarka ku Sarrifa Qiimo ka duwan ka sharciga ah oo ah in Boqolkii Dollar lagu Sarrifo 850.000 Shilin (Gacanta hore) Gacanta dambana lagu iibiyo 870.000 kun, sidaa darteed Baanka oo ka war hayaa uu laga bilaabo Maanta Tallaabo Sharciya ka qaadayo Sariiflaha Lacagta ku beddela Qiimo ka duwan kaa sharciga ah ee Baanku jaan-gooyey.
“Baanku wuxuu Qiimaha Sarrifka ku ilaalinayaa 8500 (Gacanta hore) iyo 8700 (Gacanta dambe), si shilinkeena Somaliland uu qiimo u yeesho, Ilaahay Mahaddii Qiimihii aanu u joog-goynay ayuu suuquna ku jaan-go’ay,” ayuu yidhi Agaasime Maxamed Qaasim, waxaanu intaa ku daray, “Sidaa darteed, waxaan digniin u dirayaa Dadka ama Meheradaha Ganacsi ee dhibka ku haya suuqa Sarrifka, kuwaasi oo Dadka u xisaabaya Qiimo aan ahayn kii uu Baanku jaan-gooyey, taasi oo keenaysa khalkhal ama nidaam-xumo xagga sarrifka ah. Waxa kale oo intaa dheer in qaar ka mid ah Sarrifleyaashu ay suuq Madow ku sarrifaan lacagaha”.
Agaasimaha guud ee Baanku wuxuu digniin u diray Meheradaha iyo Sarrifleyaasha Baal-mara Qiimaha uu Baanku jaan-gooyey, waxaanu yidhi, “Sarrifleyaasha ama Ganacsadaha lagu arko isagoo isticmaalaya Qiimo ka duwan ka Baanka, Cidday doonto ha ahaato in Tallaabo adag oo sharciga waafaqsan laga qaadayo, Sarriflaha lagu arko Isagoo wax ku sarrifaya Qiimo ka duwan ka Baanku dejiyey waa ballan in Liisanka lagala noqonayo”.
Agaasimuhu wuxuu intaa ku daray in Baanku sameeyay goob ay Dadweynuhu ku soo hagaajiyaan cabashooyinka la xidhiidha Qiimaha Sarrifka ee sharci-darrada ah.
Waxa kale oo Madasha ka hadlay Guddoomiyaha Ururka Sarrifleyaasha Somaliland Barkhaf Cumar Coofiye, kaasi oo soo dhaweeyay go’aammada Maamulka Baanku soo saareen.
Somalilandpost.net
contact@somalilandpost.net