Hargeysa, (SLpost)– Waxa maanta Jaamacadda Hargeysa ka qalin jabiyey ardaydii ugu badnayd abid ee jaamacadda ka baxda kuwaas oo uu shahaadooyinka guddoonsiiyey Madaxweyne Axmed Maxamed Maxamuud (Siilaanyo).
Ardaydan qalin-jabisay oo tiradoodu ahayd 538 oo muddo afar sanno ah waxbarashadooda ku jiray waxay qaateen shahaadada koowaad ee First Degree oo ay ku qalin-jabiyeen kulliyadaha kala duwan ee Sharciga (Law), ICT, Daraasaadka islaamiga ah, Maamulka iyo maareynta, Ganacsiga, xalinta khalaafaadka, Statics-ka, Caafimaadka, Sayniska iyo kulliyado kale.
Munaasibad Balaadhan oo loo qabtay qalin jabinta ardayada jaamacada dhamaysatay ayaa waxa kale oo ka qeyb galay, Gudoomiyaha Maxkamada Sare Yuusuf Ismaaciil Cali, Hoggaamiyeyaasha Axsaabta KULMIYE Md. Muuse Biixi Cabdi, UDUB Axmed Yuusuf Yaasiin Xubno ka mid ah Golaha Wasiiradda, waalidiin iyo marti sharaf kale.
Madaxweynaha Somaliland Md. Axmed Maxamed Siilaanyo oo ka hadlay xafladaasi ayaa bogaadiyay ardaydii qalin jabisay waxaanu yidhi “Marka u horaysa waxaan hambalyo aad iyo aad u balaadhan aan u soo jeedinayaa ardayda ka qalin jabisay jaamacadan Hargeysa iyo macaliimiinta iyo maamulka Jaamacada ee ardaydan wax baray waxaan doonayaa inaan u sheego in anigoo ku hadlaya magacii dawlada Somaliland inaanu ku faanayno qiimayn iyo qadarin aad u weyna aanu siinayno. Waxaan idin leeyahay intiina maanta qalin jabisay Hambalyo.”
Waxa kale oo uu Md. Soolaanyo intaasi ku daray “Jaamacada Hargeysa waa Jaamacada u weyn aad iyo aad u taariikhiya, waa jaamacad qaranka Somaliland iyo dadweynuhu aad ugu faanayaan, waxaan u rajaynaynaa inay guusha iyo heerka ay maanta marayso ay kor uga sii socoto,”ayuu yidhi Madaxweyne Axmed Siilaanyo. Waxa kale oo uu sheegay inuu hambalyo iyo Bogaadin u soo jeedinayaa shirkadaha iyo dadweynaha reer Somaliland ee jaamacada Hargeysa gacanta ka geystay. “Waxaan hambalyo iyo bogaadin u soo jeedinayaa shirkadaha iyo dadweynaha reer Somaliland ee gacanta ka geysatay dhismaha jaamacada waxaan waliba ku sii guubaabinayaa inay halkaasi ka sii wadaan,”ayuu yidhi Madaxweynuhu.
Madaxweynaha oo hadalkiisa sii watay wuxuu yidhi “Anagu dawlad ahaan waxaanu balan qaadaynaa inaanu gacan ka geysano wax kasta oo ay jaamacaddaha dalku u baahdaan,waxaan idin leeyahay waxaanu wax idin kala qaban doonaa baahiyo badan oo aad sheegateen.”
Wasiirka Wasaarada waxbarashada Somaliland Marwo Samsam Cabdi Aadan, oo ka hadashay xafladaasi ayaa bogaadisay ardaydii ka qalin jabisay Jaamacada Hargeysa waxaanu tilmaantay inay ku faraxsan tahay ardayda tiradaasi lee gee ka aflaxday Jaamacada.
“Jaamacada Hargeysa ma aha Jaamacad gobol mana aha jaamacad cidi leedahay ee waa jaamacad qaran,”ayay tidhi marwo Samsam Cabdi Aadan.
Guddoomiyaha Ku meel gaadhka ah ee Jaamacada Pof. Muuse Aadan Axmed, oo isaguna xafladaasi ka hadlay ayaa sheegay in isagoo ku hadlaya magaca ardayda qalin jabinaysa uu u mahad celinayo marti sharafta uu u horeeyo madaxweynaha Somaliland ee ka qayb galay xafladan. Waxa kale oo uu bogaadiyay waalidiinta iyo marti sharafta kala duwn.
Hadaladii Gudoomiyahana waxa ka mida ahaa “Ardaydani waa dufcadii ugu badnayd ee ka qalin jabisa jaamacadaha dalka, waana dufcadii 8-aad ee ka baxda jaamacada Hargeysa, waana 538 arday, oo hablo ay yihiin 150 arday oo u dhiganta 27% iyo 388 wiil,”ayuu yidhi Gudoomiyaha Jaamacada Hargeysa Guddoomiyaha oo la dardaarmayay ardayda qalin jabisay waxa uu yidhi “Idin odhan maayo waad qalin jabiseen ee waxaad dhamayseen afartii sanadood ee hore waxbarashadiinuna waa bilow, bini’aadmiguna illaa maalinta uu dhasho ilaa maalinta uu dhimanayo waxa uu ku jiraa waxbarasho. Waxa ku jira ardaydan qalin jabinaysa 29 arday oo bartay Cilmiga Tiro koobka (Statics-ka). Waxaanu madaxweynaha Somaliland ka codsanaynaa in intii uu kari karo ardaydaasi jaamacada ka qalin jabisay uu shaqo u raadiyo. “
Waxa kale oo uu Gudoomiye Muuse intaasi ku daray “Waxa kale oo aanu madaxweynaha ka codsanaynaa jaamacadu waxay muddo ku jirtay maamul ku meel gaadh ah, ILAAHAY ha u naxariistee Guddoomiyihii hore Muuse Cabdi Cilmi laba jeer oo ku meel gaadh ah ayuu galay, ninkii ku xigayna ku meel gaadh ayuu ahaa laakiin dan gaar ah ayuu u baxay , waxaan Anigu xilkii ula wareegay si ku meel gaadh ah 11 arday oo ka mid ah kuwii sanadkii hore jaamacada ayaanu macalimiin ayaanu ka dhignay markii ay muddo ku shaqaynayeen ku meel gaadh markii jaamacadu koorasyo u dirtay ee aqoontooda kor loo qaaday imika waxay yihiin macalimiin jaamacadeed oo rasmi ah. Waxaanu doonaynaa inaan jaamacadu ay qeyb libaax ka qaadato qeybaha kala duwan ee bulshada Somaliland haddii ay tahay daraasad iyo horumarinba,”ayuu yidhi Muuse Aadan Axmed.
Dhanka Xisbiyada, waxa munaasibaddaas ka hadlay Guddoomiyaha Xisbiga Kulmiye Muj. Muuse Biixi Cabdi, Guddoomiyaha xisbiga UCID Eng. Faysal Cali waraabe iyo Guddoomiye ku-xigeenka xisbiga UDUB Axmed Yuusuf Yaasiin, iyaga oo masuuliyiintani bogaadin u jeediyey ardaydii ka qalin jabisay jaamacada waxaanay waxaanay dhiirrigeliyeen in Fursado shaqo loo abuuro Ardaydan waxbarashada dhammaysatay.
Somalilandpost.net
Contact@somalilandpost.net