Hargeysa (SLpost)- Qormadan oo uu wargeyskan Geeska Afrika ilo kala duwan ka soo dheegtay waxa aynu si kooban ugu eegaynaa qisaska jacayl ee boqorro iyo hoggaamiyeyaal caalami ahi qirteen in ay soo mareen, gaar ahaan qisaskooda guurka ku dambeeyey.
Ardayaddii Clinton magaciisa illowsiisay:
Subax Arbacaad oo ku beegnayd 21kii Jeenaweri sannadkii 1998kii, ayaa uu Bill xaaskiisa oo hurdada kaga dambaysay toosiyey, kadib inta uu sariirta darafkeeda soo fadhiistay ayaa uu ku yidhi, “Wargeysyada maanta waxaa ku qoran war, waxa aanan doonayaa inta aanad warkaas akhriyin in aan wax kuu sheego” Warka uu Madaxweyne Bill Clinton afadiisa uga sii dardaarwerinayaa waxa uu ahaa bilowga fadeexaddiii caanka noqotay ee xidhiidhkii jacayl ee madaxweyne Bill Clinton iyo ardayaddii tababarka ku qaadanaysay guriga Cad ee Monika Lewinsky.
Hillary Clinton, sida ay ku sheegtay buuggeeda ‘Living History’ oo soo baxay 14 sano ka hor, in kasta oo warkani uu shoog ku riday haddana waxa ay ku calool adaygtay in ay garab istaagto saygeeda sumal xadka lagu eedeeyey oo ay ku caddayd in uu xidhiidh qarsoodi ah la’ lahaa ardayadda day’da yar.
Tobannaan sano ka hor ayaa uu ahaa kulankii koowaad ee xidhiidhkii jacayl ee guurka ku hoggaamiyey Hillary iyo Bill Clinton, waxa ay ku kulmeen Maktabadda Jaamacadda, kadib markii wiilka quruxda badnaa inta uu istaagay uu si aad ah ugu dhaygagay wejiga ardayadda dadaalka badnayd oo daqiiqado raadinaysay kitaab. Goor uu cabbaar eegayey ayaa ay Hillary ku war heshay indhaha ardayga Clinton ee sida yaabka leh ugu soo maqan, markiiba waxa ay wejigiisa ka daalacatay in uu danaynayo. Dhiirranaan yaab leh oo aan inta badan dhicin ayaa inta ay tallaabo kalsooni leh dhinaciisa ugu soo dhaqaaqday waxa ay ku tidhi, “Haddii adiga oo aan hadlin aad sidaas uun ii soo eegto, weligeen isma baran karno, ee barasho wanaagsan, aniga Hillary ayaa la’ i yidhaahdaa”
In kasta oo uu Clinton ka helay ardayaddan, aadna u eegayey, haddana kama uu filayn dhiirranaantan ay kaga naxsatay, sidaa awgeed markii ay ereyadan ku tidhi, hadalkii ayaa isaga dhex daatay oo isaga oo ka sheekaynaya waxa uu yidhi, “Markii ay intaa igu tidhi, xitaa magacaygii ayaa aan illaaway”
Afadii uu jeclaa markii ay ka dhimatay ayuu go’aansaday in aanu guursan gabadh dambe oo uu wejigeeda sii arkay
Buugga lagu magacaabo “Nisaa’u Zucamaa” haweenka hoggaamiyeyaasha, oo uu leeyahay qoraaga caanka ah ee Muumin Al-Muxamadi ayaa si xiise badan uga waramaya qisaska jacayl ee madaxweyneyaasha iyo boqorrada Carbeed u hayaan xaasaskooda.
Ragga uu qisaska xiisaha badan ka sheegayna waxaa ka mid ah oo uu bilowgaba soo qaddmayaa Madaxweynihii dhowaan gadoodka dadweyne xukunka lagaga tuuray ee dalka Yemen Cali Cabdalla Saalix, oo uu qoraagu sheegayo in isaga oo yar oo ahaa adhi jir, raaca xoolaha qoyska caanka ah ee reer Al-Axmar uu jecayl aad u xoog badan u qaaday inan iyaduna adhi jir ahayd. Sannadkii 1964kii ayaa uu Saalix gabadhaa uu sida aadka ah u jeclaaday guursaday, isaga oo markaas 17 sano jir ahaa, laakiin waqtigu muddo dheer iskuma simin oo 15 sano kadib ayaa ay shil baabuur ku geeriyootay sannadkii 1979kii, waxa aanay ka tagtay shan hablood iyo laba wiil.
Geeska