Hargeysa (SLpost)- Munaasibad lagu qabtay xarunta wasaaradda Dhalinyarada, Ciyaaraha iyo Dalxiiska, ayaa kooxda heerka koowaad ee kubada kolayga ee ciidanka qaranka ee Gashaan lagu gudoonsiiyey koob ay dhawaan ku guulaysteen oo tartankiisu ku qabsoomay garoonka kubadda kolleyga ee Timacade Staduim.
Tartankaasi oo la bilaabay 20-kii February oo ahayd xuskii maalinta dhalinyarada Somaliland, ayaa waxa ka qayb-galay lix kooxood oo kubada koleyga ah, waxaana ugu dambayntii reeb-reeb ka dib guushu ku raacday Kooxda Gaashaan inay hantaan koobkan.
Munaasibadda guddoonsiinta Koobka, ayaa waxa ka qayb galay Agaasimaha Guud ee Wasaaradda Dhalinyarada, Ciyaaraha iyo Dalxiiska Md Maxamed Xuseen Axmed (Dhabeeye), Guddoomiyaha Xidhiidhka Kubadda Kolayga Maxamuud Xassan Cabdilahi, Guddoomiyaha Olambikada Qaranka Xassan Waraabe Cade, Agaasimaha waaxda ciyaaraha ee wasaarada Maxamed Nuux Jibriil, Xoghayaha Xidhiidhka Kubadda Kolayga Mahdi Cabdi Yuusuf, Khadar Xariir oo ka socday ururka dhalinyarada ee SONYO iyo kale marti sharaf kale.
Ugu horeyn waxa halkaas ka hadlay Guddoomiyaha Xidhiidhka Kubadda koleyga Maxamuud xasan Cabdilahi (Qodax) oo sharraxay ujeeddooyinkii tartanka kooxaha heerka koowaad, waxaanu ammaan iyo mahad celin u jeediyay Wasiirka Wasaarada waxbarashada Marwo Samsan Cabdi Aadan iyo Daladda dhalinyarada ee SONYO oo uu sheegay inay kaalin mug leh ka qaadeen qabsoomidda tartankaas.
Guddomiyaha Olambikada qaranka Xassan Waraabe Cade oo isna goobtaas ka hadlay ayaa ugu horeyn hambalyo u diray kooxda Gaashan ee noqotay horyaalka kubadda Koleyga ee kooxaha heerka koowaad ee dalka. Guddoomiyuhu wuxuu ku dheeraaday taariikhda kubada kolayge ee dalka, waxaanu dhalinyarada iyo bahda ciyaaraha ugu baaqay inay taageero la garab-joogsadaan koox kubadda Koleyga ah oo metelaysa dalka oo dhawaan u baxaysa dalka Tanzania, halkaas oo ay kaga qayb galayaan tartanka Barriga iyo badhtamaha Afrika.
Ugu danbayntii, waxa xafladaas soo gunaanaday Agaasimaha Wasaarada Dhalinyarada iyo Ciyaaraha Md Maxamed Xuseen Dhabeeye oo ku hambalyeeyay ciyaartoyga kubadda kolayga ee kooxda Gaashaan iyo maamulkoodaba guusha ay hanteen. Sidoo kale, waxa uu bogaadiyey kooxihii aan jaanisku siinin inay tartankan ku guulaystaan.
Khaalid Axmed Dhuxul oo ka tirsan kooxda Gaashaan ayaa noqday ciyaartoygii ugu goolal dhalinta badnaa intuu tartanku socday, halka Mustafe Xassan Cabdilaahina uu noqday laacibkii ugu wanaagsanaa tartanka.
Xubnaha kale ee madasha ka hadlay waxa ka mid ahaa Agaasimaha waaxda ciyaaraha ee Wasaarada Ciyaaraha Maxamed Nuux, Aadan Jaamac Sooyaal (Shekeeye) iyo sidoo kale Khadar Xariir oo ka socday Dalada dhalinyarada ee SONYO oo tartankan qabsoomidiisa kaalin mug leh ku lahayd iyagoo dhamaantood si qoto dheer uga sheekeeyay muhiimada ay ciyaaruhu uleeyihiin dhalinyarada Somaliland.
SOMALILANDPOST.NET