Garaadkaygu waa dhaafsan yahay , xaajo goboleede
Dareenkaygu gooddiga sibuu , ii gilgilayaaye
Guhaad iyo canaan buu hiyigu, ii gab-leeyahaye
Inta garasho ii meel la’dahay , tayda maan gudane
Hadba waxan galiilyoonayaa, goobo lay tebaye
halmarna waan qaybsanaa , halmarna waan midownaa, Marka shirka gollaha dhexe haldoorkiisu tartamayo, waynu qaybsanaa inagoo lakala safanayna musharaxiinta, Hal marna waan midownaa , waa marka musharaxa xisbiga la doorto.
Anigu ka Maxamed-maarshaal ahaan Kulmiye waxaan ku ahay aragti,waxaan aaminsanahay inay ku badinayso, midnimada, wada jirka, walaaltinimada, xisbinimada iyo isku duubnida iyadoon laga tagayn, waajibna ay tahay, kala doorashada, kaltanka xisbiga gudihiisa. Oo ah wax ku dhisan , aragti ka sokaysa, kulmiye-nimada, waa kal doorsansiin uu xisbigu inoo saamaxay inuu fursad inoo siiyo, inaynu ku hirdano kala doorashada haldoorka xisbiga gudihiisa, rafiiqna ku ahaano hadba kii duubka loo cumaamado.
Inagoo tix galinayna, kala duwanaanshiyaha afkaarta kala duwan ee ay qabaan, hogaamiyayaasha ku midaysan xisbiga kulmiye, waxa lagama maarmaan ah, inaynu isku dhigno tartanka dhabta ahi, inaanu ahayn ka kulmiye dhexdiisa yaala, ee uu yahay, kaynu la galayno asxaabta kale ee qarankeena.
Dabeecada iinsankay ka mid tahay, hadii ay laba qof ama kooxi, ay isku qabtaan fikir, inay ka heshiiyaan, dhayaana boogahooda. Iyagoo eegaya danta guud ee xisbinimo iyo qaranimo. hadaba Inta dhab ahaan tartanku uga dhaxeeyay, waxa dhex u ah, taageerayaasha xisbiga kulmiye.
Hadaba musharaxa inoo soo baxa, maaha mid ay kooxi ama in gaar ahi ay uga dhawdahay taageerayaasha xisbiga ee kale, taageerayaasha xisbigu maaha qaar la dudaya ama la cadhoonaya cid gaar ah, ee waxay guul iyo farxada lawadaagayaan musharaxa xisbigoodu u soo saaray, maaha qaar ka diddaya inaanu musharaxa ay taageersanaayeen soo bixin, balse waa qaar fahansan in musharaxa soo baxa ay agtiisa ka siman yihiin taageerayasha xisbiga kulmiye si aan kala sooc lahayna ugu baahan yahay musharaxaasi, xoogooga iyo taageeradoodaba.
Hadaba Waxa la jooggaa xiligii aan qaadan lahayn kaalinteena, waxa la joogaa, xiligii aan midnimada, xisbinimada iyo himilada guud aan eegi lahayn, kala duwanaanshiyaha loolanka aragtida siyaasaga ah ee hoggaaminta xisbiga kulmiye soo afjarmi lahayd
Waxa la joogaa, xiligii ka nasiibku siiyo, ujoogsan lahaa, kii nasiibku ka hiiliyay, oo uu ka baaqsado, hollashada ku dhisan tiiq tiiqsiga, sidaa si la mid ah taageerayaashuna ka wantoobaan kala fogaynta taageerayasha xisbiga.
Waxa la joogaa xiligii aan soo xidhi lahayn, fagaarayaasha kaltanka, abaabulka, ficiltanka iyo borobogaandada ee lagu kala ridanayay musharaxnimada xisbiga gudahiisa.
Waxa la joogaa xiligii aan furi lahayn, albaabada, wada xaajoodka, garnaqasiga, turxaan bixinta iyo walaalayn ku dhisan , daacadnimo, lecejeclo, niyadfurnaan iyo aragti xisbi oo aan kaga soo kabano diiftii iyo kal qaybsanaantii hirdanku ina baday
.
Guul ka wayni ma jirto inaad bu’u dhig u noqoto, isku soo dhawaansho, walaaltinimo, wax wada lahaanshiyo, tanaasusl iyo waliba is barbar galid. dhabtii awoodaha aad leedihiin maaha qaar laga maarmi karo, la dafiri karo, waxaad qayb laxaadle ka tihiin guul hordhaceedu muuqdo, waxaad baal dahab ah ka gali doontaan guushaas, balse waa marka aad midnimo ka shaqayso adigoo guul daraystay, danta gaarka ahna aad ka raacdid danta guud .
W/Q: Maxamed Cabdikarim (M-Maarshaal)